قال الدكتور محمد المهدي، أستاذ الطب النفسي، إن الحزن شعور إنساني طبيعي، وكلنا بنمر بيه من وقت للتاني، لكن الاكتئاب حالة مرضية مختلفة تمامًا وليها علامات واضحة.
وأوضح أستاذ الطب النفسي بجامعة الأزهر، خلال حلقة برنامج "راحة نفسية"، المذاع على قناة الناس، اليوم الأربعاء: "في ناس بتسألني تقول لي: أنا مضايق ومخنوق، أروح لدكتور نفسي؟ ولا أخرج أتمشى وأغير جو؟ ولا أقعد مع حد بحبه وأحكيله؟، أقوله إن الاكتئاب مش بس شعور بالحزن، لكن له أعراض محددة، أهمها إن الشخص يكون حزين طول الوقت أو حاسس إنه فقد شغفه واهتمامه بالحياة، مهما حصل حواليه".
وأشار إلى أن الاكتئاب ممكن يظهر بطرق مختلفة، زي فقدان الشهية أو زيادتها، اضطراب في النوم سواء بالأرق أو النوم لفترات طويلة، خمول شديد أو توتر زائد، ضعف في التركيز والقدرة على اتخاذ القرارات، إحساس دائم بالإرهاق والتعب، وحتى التفكير السلبي المستمر أو الانشغال بأفكار عن الموت.
وأضاف إن المشكلة أحيانًا بتكون في إن الشخص مش قادر يربط اللي بيحس بيه بالاكتئاب، خصوصًا لما تكون الأعراض جسدية زي وجع الجسم أو صداع أو ضيق في النفس.
وتابع: "المهم تسأل نفسك: المشاعر دي أثّرت على حياتي؟ عطّلت شغلي؟ بعدتني عن الناس اللي بحبهم؟ خلتني مش عايز أعمل حاجة؟ لو آه، يبقى مش محتاج خروجة.. محتاج دكتور يسمعك ويساعدك".
