كتير مننا بيحس بمود مختلف كده مع تغيير الفصول، هوا الجو اللي بيتغير والتقلبات اللي بتحصل دي ممكن تأثر على نفسيتنا وتخلينا نحس بحاجات مش لطيفة، وده ليه اسم علمي وهو "الاضطراب العاطفي الموسمي" (SAD).

الحالة دي عاملة زي اكتئاب بس بيجي في وقت معين في السنة، غالبًا في الخريف أو الشتا.،والعلماء بيقولوا إن طول الليل وقصر النهار وقلة النور ممكن يغيروا كيميا المخ، وده اللي بيسبب أعراض الاكتئاب.

بس فيه علاج زي العلاج بالضوء وأدوية الاكتئاب اللي ممكن تساعد في الموضوع ده.

إيه الأعراض اللي ممكن تحس بيها لو عندك اكتئاب موسمي؟
فيه نوعين من الاكتئاب الموسمي:

• اكتئاب الخريف والشتا (اكتئاب الشتا): الأعراض بتبدأ من آخر الخريف لحد أول الشتا، وبعدين بتخف في الصيف.
• اكتئاب الربيع والصيف (اكتئاب الصيف): الأعراض بتبدأ من آخر الربيع لحد أول الصيف، وده النوع الأقل شيوعًا.

الأعراض المشتركة بقى اللي ممكن تحس بيها:

• نوم كتير أوي ونفسك تنام طول النهار.
• مبقتش تستمتع بالحاجات اللي كنت بتحب تعملها زمان.
• بتحب تقعد لوحدك ومش عايز تشوف حد، ومبتستحملش كلمة زعل منك.
• متنرفز وقلقان على طول.
• حاسس بالذنب واليأس.
• تعبان ومرهق حتى لو معملتش مجهود.
• مش عارف تركز في أي حاجة.
• صعب تفكر بوضوح.
• نفسك مفتوحة أوي للأكل، بالذات الحلويات والنشويات.
• وزنك بيزيد.
• جسمك بيوجعك، زي صداع مثلًا.

الأعراض دي غالبًا بتروح وتيجي في نفس الوقت كل سنة، وممكن تكون شبه أعراض أمراض نفسية تانية، فمهم جدًا تستشير دكتور نفسي عشان تعرف إيه بالظبط اللي عندك.

مين أكتر ناس ممكن يجيلهم الاكتئاب الموسمي؟

الاكتئاب الموسمي غالبًا بيبدأ لما الواحد يكبر شوية، وكل ما السن بيزيد، الاحتمالية بتزيد برضه. نادر أوي لما بيجي للناس اللي أقل من 20 سنة، والستات بيجيلهم أكتر من الرجالة.

إيه طرق علاج الاكتئاب الموسمي؟
العلاج بيختلف على حسب نوع الاكتئاب (شتا ولا صيف)، وممكن يشمل حاجات زي:

• التعرض للشمس: حاول تقعد شوية برا أو حتى جنب الشباك، النور ممكن يحسن مودك.
• العلاج بالضوء: لو مفيش شمس كفاية، ممكن تستخدم جهاز بيطلع نور معين لفترة معينة كل يوم.
• العلاج النفسي: زي العلاج المعرفي السلوكي، ده بيساعدك تغير طريقة تفكيرك السلبية عن نفسك وعن الدنيا، وكمان بيعلمك إزاي تتعامل مع الناس والضغوط.

• مضادات الاكتئاب: دي أدوية الدكتور بيكتبها عشان تظبط الكيميا اللي في المخ اللي ممكن تكون السبب في الاكتئاب الموسمي.

نصايح بسيطة ممكن تعملها عشان تحسن حالتك:

• متضغطش على نفسك: خلي أهدافك واقعية، قسم الحاجات الكبيرة اللي وراك لحاجات صغيرة، ورتب أولوياتك، واعمل اللي تقدر عليه بس.

• حاول تكون مع ناس وتتكلم معاهم: بدل ما تقعد لوحدك وتكتم جواك، اقعد مع ناس بتحبهم واتكلم معاهم.
• اعمل الحاجة اللي بتريحك: ممكن تروح سينما، تشارك في نشاط ديني أو اجتماعي، أو تعمل أي حاجة تفرحك وتسعدك.