أكدت الدكتورة سماح عبد الفتاح، الاستشارية الأسرية، أن كثيرًا من الأزواج الذين مر على زواجهم سنوات طويلة اعترفوا بوقوعهم في أخطاء جسيمة بدأت منذ الليلة الأولى للزواج، ما أدى إلى تفاقم مشكلاتهم لاحقًا، وبعضهم دخل في أزمات أعمق بكثير من مجرد "خلافات بين شخصين مختلفين"، مشددة على ضرورة الوعي والتفاهم واللين منذ بداية العلاقة الزوجية.
وقالت الاستشارية الأسرية، خلال برنامج "الرحلة"، المذاع على قناة الناس، اليوم الخميس: "دلوقتي هتكلم مع بعض الأزواج على شوية أخطاء اعترف بيها ناس أكبر منكم بكتير بعد سنين من الجواز، وده مش جواز كان هادي، لا، ده جواز واجه مشاكل لأنه ما بدأش بداية صح، فخلونا نتكلم عن شوية دروس مهمة ممكن تحميكم من إن حياتكم تتعقد زي ما حصل مع ناس كتير قبل كده."
وأضافت: "في حالات كتير جدًا المشاكل بدأت من أول ليلة، الزوج داخل بعنف، قسوة، وعجلة، وكل ده سببه توقعات مش واقعية، سواء من مشاهدات غلط أو تجارب سابقة، والمصيبة إن ده بيخلي البنت تتحط في مقارنة ظالمة، وهي ما عندهاش أي خلفية أو خبرة، ويُطلب منها إنها تبقى مثالية في لحظة".
وتابعت: "التسرع ده بيخلي مشاعر الخوف والقلق اللي عند العروسة تتحول لمشكلة نفسية، عشان كده دايمًا بنوصي بالهدوء، باللين، بالرحمة. يا ريت كل زوج يسمعني دلوقتي، حنّ على مراتك، حسّسها إنك بتحبها، مش داخل معركة، إقرا كويس من مصادر محترمة، من أهل العلم والدين، وادخل على الزواج بعلم مش بخرافات."
وأردفت: "ابدأ خطوة خطوة، افهمها واتعلم معاها، ناقشها، اتفق معاها، قول لها إيه اللي عجبك وإيه اللي محتاج يتظبط، وادّيها أمان إنها تكون صريحة، دي علاقة جديدة، فيها خجل طبيعي، بس مع الوقت والحنان، كل حاجة هتتغير وهتتحسن."
وأوضحت: "خصوصية الليلة دي مش مادة للنشر ولا التندر، محدش له دعوة بالتفاصيل، سواء أختك أو صاحبتك، الرد يكون بكلمة واحدة: الحمد لله إحنا بخير، الكلام ده فيه احترام وستر ووعي، وبيدل إنكم في معية ربنا."
وتابعت: "اللي بينكم أمانة، وشوفتك لحاجة سواء عجبتك أو لأ، مكانها جوا البيت، اتكلموا مع بعض، اتعلموا من بعض، وطول ما نيتكم ترضوا ربنا وتحافظوا على بعض، ربنا هيباركلكم، الجواز مش حرب، الجواز سكن ومودة ورحمة."
