قالت الدكتورة صفاء حمودة، أستاذ الطب النفسي بجامعة الأزهر، إن التعامل مع الشخصية النرجسية يختلف حسب درجة القرب منها ونوع العلاقة، موضحةً أن وعي الإنسان بطبيعة الشخص النرجسي هو الخطوة الأولى لحماية نفسه من الأذى النفسي والمعنوي.
وأضافت أستاذ الطب النفسي بجامعة الأزهر، خلال حوار مع الإعلامية مروة شتلة، ببرنامج "البيت"، المذاع على قناة الناس، اليوم الثلاثاء: "لو علاقتي بالشخص النرجسي سطحية، يفضل تكون العلاقة محدودة زي (صباح الخير يا جاري)، لكن لو الشخص ده زميل شغل أو مدير، فالوضع بيكون أصعب، خصوصًا إن كتير من النرجسيين بيتغذوا على الإعجاب والتطبيل، وده للأسف بيشوفوه في سلوكيات بعض الناس اللي بتسعى لمصلحتها، وبالتالي بيعززوا صفاته أكتر".
وأكدت أن التعامل مع مدير نرجسي يتطلب وعيًا نفسيًا وحذرًا، قائلة: "لو المدير بيؤذيني نفسيًا، ومش بيتعاطف مع ظروف شخصية أو شغل، مش معنى كده أسيب الشغل فورًا، لكن أظبط أموري، وأحط حدودي بشكل محترم، يعني لو بيتجاوز لفظيًا، أقول له: من فضلك اتكلم بطريقة أحسن".
وتابعت: "الأذى أحيانًا بيكون معنوي مش مباشر، زي إنه يقلل من شغلك، أو يقول كلام يحبطك رغم إنك بتؤدي شغلك كويس جدًا. في الحالة دي مهم أميز إن تقييمه غلط، وأبدأ أدرب نفسي على تجاهل كلامه، وأتمسك بالثقة في نفسي من خلال الشغل اللي بقدمه، والنتائج الفعلية اللي بتثبت إن شغلي جيد".
وأردفت: "نحتاج نتدرب على إننا نوقف الناس عند حدودهم، ونفهم إن بعض الأشخاص وجودهم في حياتنا اختبار، ولو ما قدرناش نغيرهم، نقدر نغير طريقة تعاملنا معاهم، ونحط لأنفسنا مسافة أمان نفسية نحافظ بيها على سلامتنا الشخصية والمعنوية".
