مع اقتراب امتحانات نهاية العام الدراسي 2025، يبدأ أولادنا في الاستعداد والمراجعة، وفي الوقت نفسه تحاول الأمهات تكثيف المتابعة والمساعدة، لكن كتير من الأمهات ممكن يتعاملوا بعصبية وصراخ، ظنًا منهن إن ده هيشجع الأولاد على المذاكرة، في حين إن النتيجة بتكون عكسية تمامًا.

ولأن المتابعة الهادئة والداعمة بتجيب نتائج أفضل، نشر موقع Today's Parent مجموعة من الخطوات البسيطة والفعالة اللي ممكن تساعد كل أم إنها تتابع مذاكرة أولادها من غير توتر أو غضب:

1- افهمي سبب العصبية

أول خطوة هي إنك تعرفي أصل المشكلة، هل السبب إن الولاد مش بيذاكروا كويس؟ ولا تعبك من الشغل والمسؤوليات؟ ولا في ضغط تاني مأثر عليكي؟ لما تحددي الأسباب الحقيقية، هتقدري تتحكمي في رد فعلك وتتعاملِي بهدوء.

2- اكتبي الحلول

بعد ما تعرفي الأسباب، اكتبيها، وحطي قدام كل سبب حل ممكن يساعدك، زي إنك تعملي جدول مذاكرة مرن، أو تخصصي وقت لنفسك للراحة، أو حتى تعملي نشاط بتحبيه، التدوين بيخلي الأمور أوضح وأسهل في التنفيذ.

3- غيري الأسلوب خطوة بخطوة

الغضب المستمر بيأثر على نفسية الولاد وعلى علاقتك بيهم، حاولي تبدأي في تغيير طريقة تعاملك معاهم بالتدريج، زي إنك توازني بين وقت المذاكرة والراحة، وتخلقي لحظات إيجابية بينكم، هتحسي بفرق كبير في الجو العام في البيت.

4- خدي لحظات هدوء ليكي

جربي تعملي تمارين تأمل بسيطة كل يوم. حتى لو 5 دقايق بس تقعدي فيها في هدوء وتتنفسي بعمق، هتساعدك تروقي وتضبطي أعصابك، التأمل بيقلل التوتر، وبيخلي النوم أحسن، وكمان بيرفع تركيزك طول اليوم.


فترة الامتحانات محتاجة دعم وهدوء، مش توتر وصوت عالي، ولو كل أم قدرت تهتم بنفسها وتغيّر أسلوبها بهدوء، هتقدر تساعد أولادها يوصلوا لأفضل نتائج من غير ما تتعب هي كمان.