كتير من الشباب وأصحاب الحرف في مصر عندهم أفكار حلوة لمشروعات خاصة بيهم، لكن المشكلة الأكبر بتكون في السيولة المالية اللي تساعدهم يبدأوا فعلاً.

وهنا بييجي دور البنك الزراعي المصري اللي بيدعم المشروعات الصغيرة والمتوسطة ومتناهية الصغر من خلال قروض ميسرة بشروط سهلة، عشان يدي دفعة قوية للحرفيين وأصحاب المشروعات الجديدة.

 إيه هو برنامج "باب رزق"؟

البنك الزراعي المصري أطلق برنامج "باب رزق" مخصوص عشان يمول أصحاب الحرف والمرأة الريفية والمعيلة، وكمان صغار التجار والباعة الجائلين، عشان يدعم مشروعاتهم الجديدة، ويبدأوا ينفذوها، وتكون مصدر رزق جديد لهم ولأسرهم.

تفاصيل القرض وشروط السداد

إيه هي شروط قرض البنك الزراعي لأصحاب الحرف والمستندات المطلوبة؟

في البداية الكلام كده، البنك هيمولك قرض بيبدأ من 2000 جنيه، لحد 10 آلاف جنيه، وبيتم السداد على أقساط.
وكمان برنامج "باب رزق" بيحدد دوريات متنوعة للسداد؛ سواء شهرية وربع سنوية ونصف سنوية، وفقا لطبيعة التمويل والغرض من النشاط.
 
ونقدر نقول كمان إن أقصى فترة سداد هي 12 شهر يعني سنة، وأقل فترة 6 شهور.

أهم مميزات قروض البنك الزراعي المُيسرة

- إنه متاح بدون مصاريف، وكمان في تنوع لأنظمة السداد عشان تناسب جميع أصحاب المشروعات ضمن هذه الفئة.
 
- سهولة الإجراءات وسرعة الحصول على القرض وصرف والتمويل، طالما مستوفي الشروط، وممكن يتم منح فترة سماح تصل لـ60 يوم قبل دفع أول قسط، وفي إمكانية الإشتراك بين 4 مقترضين للقرض نفسه.
 
- متاح ضمان المقترضين بعضهم البعض، ومسموح بإصدار بطاقة ميزة البنك الزراعي مجانية، ولكن لازم حضرتك تحضر صورة البطاقة الشخصية، وإيصال مرافق حديث، زي إيصال المياه أو الكهرباء أو الغاز، وكمان البطاقة الشخصية للضامن، عشان تقدر تاخد القرض.
 
لو انت جاهز تأخد القرض، لمّ أوراقك واتجه لأقرب فرع للبنك الزراعي المصري وابدأ مشروعك من النهاردة.