قالت الدكتورة صفاء حمودة، أستاذ الطب النفسي بجامعة الأزهر، إن التعامل مع الشخصية النرجسية داخل البيت، سواء كان الزوج أو الزوجة، هو من أصعب أنواع العلاقات، لأنه في كثير من الحالات بيكون الانفصال غير مطروح، وبالتالي العيش المشترك يصبح تحديًا مستمرًا يتطلب ذكاء نفسي ومرونة شديدة.
وأضافت أستاذ الطب النفسي بجامعة الأزهر، خلال حوار مع الإعلامية مروة شتلة، ببرنامج "البيت"، المذاع على قناة الناس، اليوم الثلاثاء، أن أهم خطوة للتعامل مع شريك نرجسي هي: "ما تخليهوش يسحبك في جدالات لا طائل من ورائها، لأن النرجسي ممكن يضغط ويزنّ ويطالبك مش بس بالموافقة، لكن بالإيمان الكامل برأيه، ودي حاجة مرهقة جدًا للطرف التاني".
وشددت على أهمية إيجاد حياة خارج إطار العلاقة، قائلة: "لو في صمت عقابي أو تجاهل أو إهانة، لازم يكون عندك دوائر دعم خارجي.. أصحاب، أهل، نشاطات، حاجات تديك إحساس بالقيمة بعيد عن النرجسي اللي ممكن يفضل بالشهور ما يتكلمش، أو يديك أقل من حقوقك حتى قدام أولادك".
وأوضحت أن بعض الأزواج النرجسيين "بيقللوا من الزوجة قدام ولادها، يشوهوا صورتها، ويخلوا الأولاد شايفين إن كل حاجة ترجع له هو، وكأن الأم مش موجودة، وفي نوع يصرف على نفسه بس، يجيب لنفسه أغلى حاجة، والزوجة والأولاد يتعاملوا بالعادي أو أقل".
وعن الزوجة النرجسية، أشارت إلى أن ملامحها مختلفة، قائلة: "الزوجة النرجسية بتظهر أكتر في دور الضحية، اللي دايمًا تعبانة، ومظلومة، وبتبكي، وبتضغط على الأولاد، وبتستخدم مشاعرهم طول الوقت عشان تفضل المسيطرة والمهيمنة".
وأكدت الدكتورة صفاء أن تشخيص الطرف الآخر بالنرجسية بشكل دائم بيخلّي الشخص يعيش في ضغط نفسي مستمر، وقالت: "بلاش طول الوقت نعلق يافطة (نرجسي) على شريك حياتنا، لأنك هتتفسري كل تصرف منه بطريقة سلبية، وهتعيشي في عذاب دائم".
وتابعت: "متخليش حياتك كلها تتمحور حواليه. جوده حياتك مش بتقاس بجوزك بس، العلماء لما قاسوا جوده الحياه قاسوها على 16 محور، من ضمنها العائلة، الصحة، العبادة، الأصدقاء، العمل، والمال، فاعملي لنفسك دوائر رضا تانية، عشان ما تنهاريش لما يتجاهلك أو يصمت أو يهملك، استثمري في نفسك، واعملي لنفسك حياه تستحقيها".
