مع اقتراب عيد الأضحى المبارك 2025، يحرص الكثيرون على اختيار أضحية خالية من العيوب والأمراض، تلبيةً لسنة الأضحية وتحقيقًا للغرض الشرعي منها، وفي هذا السياق، يقدم موقع "اجري نيوز" الاخباري، دليلاً مبسطًا لأهم الشروط الشرعية والفنية الواجب توافرها عند شراء الأضحية، لضمان اختيار حيوان سليم وصالح للذبح.

الشروط الشرعية للأضحية:

1-من بهيمة الأنعام: لازم تكون الأضحية إبل أو بقر أو غنم (ضأن أو معز)، مينفعش طيور أو سمك.
 استنادًا إلى قوله تعالى:
"وَلِكُلِّ أُمَّةٍ جَعَلْنَا مَنْسَكًا لِيَذْكُرُوا اسْمَ اللَّهِ عَلَى مَا رَزَقَهُمْ مِنْ بَهِيمَةِ الْأَنْعَامِ" (سورة الحج، الآية 34).

2-بلوغ السن المحدد: 

-الإبل: أكملت 5 سنين ودخلت في الـ 6.
-البقر: أكملت سنتين ودخلت في الـ 3.
-الغنم: أكملت سنة.
-الضأن: أكمل 6 شهور.

3-خالية من العيوب الظاهرة:

مينفعش تكون عوراء، أو عرجاء، أو قرنها مكسور، أو مريضة بمرض واضح زي الحمى أو الجرب، أو هزيلة جدًا.

نصائح مهمة عند الشراء:

1- اشتري من مكان موثوق: ابعد عن الباعة الجائلين وركز على شوادر وزارة الزراعة والمزارع المتخصصة، لأنها غالبًا بتكون بتتغذى كويس وده بيأثر على جودة اللحم.

2- استشير أهل الخبرة: لو مش متعود تشتري أضاحي، خد معاك حد بيفهم أو اسمع نصايحه. الأفضل تشتري بالوزن القائم عشان تتجنب الغش.

3-تأكد إن الخروف سليم: لازم يكون نشيط وحيوي، راسه مرفوعة، تنفسه طبيعي، ومفيهوش كحة أو نهجان.
4-افحص العيون والصوف: عينيه لازم تكون لامعة ونضيفة، والصوف مينفعش يتنتف بسهولة.
5-مفيش إفرازات أو التهابات: بص على الأنف والفم واللسان، ومتأكدش إن مفيش إسهال من تحت الديل.
6-افحص الجسم والقوائم: جسمه لازم يكون نضيف مفيش فيه خراج أو ورم أو أي أمراض جلدية، وقوائمه سليمة.
7-شوف بياكل كويس ولا لأ: الحيوان السليم بيكون عنده شهية للأكل.
8-الفحص باليد للأغنام: عشان الصوف بيكون كتير، لازم تتحسس الرقبة والظهر عشان تتأكد إنهم مليانين لحم ومفيش أي مشاكل.
9-اعرف عمر الخروف: السن المناسب للذبح بيكون بين سنة وسنتين للذكور، والأفضل بين 8 و 12 شهر.

وبيعرفوا العمر من الأسنان الأمامية اللي تحت: 

-أقل من سنة: الأسنان صغيرة ومتساوية.
-سنة – سنة ونص: بيبدأ يبدل أول جوز من الأسنان.
-سنة ونص – سنتين ونص: بيبدل تاني جوز.
-سنتين ونص – تلات سنين ونص: بيبدل تالت جوز.
-تلات سنين ونص – 4 سنين: بيكون عنده 8 أسنان كبيرة.
-بعد كده الأسنان بتبدأ تتآكل وتتباعد وتصفر لحد ما تقع عند حوالي 8 سنين.