حذر الداعية الإسلامي عمرو مهران من تأثيرات المقارنات المستمرة مع الآخرين والضغوط المجتمعية التي تؤثر على النفس البشرية.
وقال الداعية الإسلامي عمرو مهران، خلال حلقة برنامج "مع الناس"، المذاع على قناة الناس، اليوم الاثنين: "الدنيا هتدخل في قلبك، والمعتقدات بتاعتك هتتغير على أساس من فين وصلت وإنت عملت إيه.. في وقت من الأوقات، الناس كانت بتقيم بناءً على النتائج، والشيطان يجي يزرع فينا فكرة المقارنة: شفت غيرك عمل وحقق، وانت لسه مكانك، وهكذا تبدأ الدنيا تظلم في عينينا وتضيع عزيمتنا."
وأضاف: "الشيطان يلعب معانا في العقول والأفكار، ويبدأ يحسسنا بعدم الكفاءة أو الإحباط، ويزرع فينا فكرة إننا مش قادرين نكمل أو نحقق حاجة، فيبدأ يقضي على طاقتنا.. الفكرة إنه يقنعنا إننا ما استحقناش نعيش، وإننا مش قادرين نفيد غيرنا أو نعمل فرق في الحياة.. ده الهدف الحقيقي للشيطان، أنه يهدنا."
وتابع: "المقارنات والتنافس مع الآخرين بتغرس في القلب سم السموم، واللي هيكبر جوه هو الألم، في يوم من الأيام، ممكن تلاقي نفسك مش قادر تعيش، مش قادر تسيطر على حياتك، مش قادر تلاقي راحتك، ده شيء صعب جدًا، والكل بيعيش نفس الصراع، لكن الحل في الإيمان بالله."
وأردف: "الحل يكمن في الإيمان بأن الله هو الرزاق، وأن الله هو الوكيل، وأنك تعمل اللي عليك وتتوكل على الله في كل خطوة، إذا صدقت في الإيمان إنك عبد لله، وانك ساعٍ لأداء ما عليك، والنتائج بيد الله سبحانه وتعالى، هتشعر بالسكينة والراحة، مش لازم تتابع وتنافس كل واحد، كل واحد له رحلته."
وتابع: "إحنا في غنى عن الخوف والقلق، الحل هو أن نؤمن بالله ونطمئن بقلوبنا على ما يقدره لنا، نركز في رحلتنا، لا نقارن أنفسنا بأي أحد آخر، وندرك أن الله هو الرزاق، وهو الفاعل والقوي، وهو الوكيل، فلنترك الدنيا تسود في عينينا ولنحافظ على إيماننا بالله."
