الورد الطبيعي بيضيف جمال وبهجة لأي مكان، لكن للأسف جماله مش بيدوم طويل، عشان كده، لو عايز تحافظ على باقة الورد بتاعتك نضرة لأطول فترة ممكنة، فيه خطوات بسيطة ومهمة لازم تعملها.

إليك مجموعة من النصائح المهمة للعناية بالورد المقطوف، واللي هتساعدك تحافظ على نضارة وجمال باقة الورد الطبيعي لأطول وقت ممكن في بيتك:

1-القص الصحيح للساق:

أول خطوة وأهمها هي قص حوالي 2.5 سم من ساق الورد بزاوية 45 درجة. القص المائل بيخلي الساق تمتص المية بشكل أفضل.

2-المزهرية والماء المناسبين:

بعد القص، حط الورد بسرعة في مزهرية مليانة للثلث أو النص بس بالمية الدافية. بلاش مية كتير عشان متعملش بكتيريا وتعفن.

3-التهيئة الأولية:

متزحمش الورد في مزهرية واحدة. حط الورد في مكان بارد ومظلم لمدة 4-5 ساعات قبل ما تنسقه. ده بيدي الورد فرصة يشرب مية ويرتاح.

4-استخدام المواد الحافظة:

ممكن تستخدم مادة حافظة للزهور بتتباع في محلات الورد، أو تضيف غطاء من مبيض الغسيل (كلور) للماء. المبيض بيساعد على قتل البكتيريا.

5-نظافة الورد:

شيل أي أوراق هتكون تحت مستوى سطح الماء عشان متتعفنش وتعمل فطريات، كمان، شيل أي وردة دبلانة أول بأول عشان متأثرش على باقي الباقات.

6-تغيير الماء بانتظام:

حتى لو حطيت مواد حافظة، لازم تغير المية كل يوم أو يومين. ده بيمنع نمو الفطريات وبيحافظ على الورد. ضيف مادة حافظة جديدة مع كل تغيير للمية.

7-أبعد الورد عن الأعداء:

فيه حاجات بتخلي الورد يدبل بسرعة زي غاز الإيثيلين، عشان كده، متسبش الورد جنب الفاكهة الطازجة، ودخان السجائر، وعوادم العربيات.

تغذية إضافية للورد.. أسرار بسيطة من بيتك

عشان تخلي الورد يعيش معاك فترة أطول، ممكن تضيف مغذيات بسيطة للمية:
- الأسبرين: حط قرص أسبرين في وعاء المية، وكررها تاني يوم، ده ممكن يحافظ على الورد نضر من 5 لـ 9 أيام.
- السكر والليمون: اخلط لتر مية مع معلقتين كبار عصير ليمون، ومعلقة كبيرة سكر، ونص معلقة صغيرة مبيض (كلور)، السكر بيغذي الورد والليمون والكلور بيمنعوا نمو البكتيريا والفطريات.

فن اختيار الورد.. السر يبدأ من هنا
نضارة الورد بتبدأ من اختيارك ليه، إليك نصائح عشان تختار ورد يعيش معاك طويل:

- ري الشجيرة قبل القطع: لو هتقطف الورد من حديقتك، اروي الشجيرة كويس بالليل اللي قبلها، الورد المرطب بيعيش أكتر بعد القطف.
- وقت القطع أو الشراء: اقطف الورد في الصباح الباكر بمقص نظيف قبل ما الجو يسخن، أو اشتريه من محل ورد موثوق فيه وحطه في دلو مية فريش فورًا.

- فحص الورد: تأكد إن الورد مفيش فيه أي كسور أو كدمات، اضغط على البتلات بخفة؛ لو حسيتها مشدودة ومطاطية يبقى الورد ده طازة وجودته كويسة.