لو بتجهزي أكلة وعايزة تضيفي حاجة صحية، مشبعة، وسهلة على المعدة، جربي تحطي شوية برغل جنب الطبق الرئيسي البرغل مش بس بديل بسيط للرز أو المكرونة، ده كمان مليان فوايد غذائية ممكن تدّي للأكلة قيمة أعلى من غير ما تبذلي مجهود.

مفيد لقلبك:

البرغل بيحافظ على صحة القلب لأنه من الحبوب الكاملة، ودي معروفة إنها بتقلل من فرص الإصابة بأمراض القلب بنسبة كبيرة. يعني كل ما زودت من أكلك للحبوب الكاملة زي البرغل، قلبك هيكون في أمان أكتر.

يحميك من الجلطات:

البرغل فيه ألياف، فيتامين ك، ومضادات أكسدة وكل دول بيشتغلوا مع بعض علشان يقللوا من خطر الإصابة بـ السكتة الدماغية، وده واحد من الأسباب الرئيسية للوفاة حول العالم.

يظبط السكر:

لو عندك تاريخ عائلي مع السكر النوع التاني، أو بتفكر في الوقاية، يبقى البرغل اختيار ممتاز! لأنه بيساعد على تقليل السكر في الدم، وبيزود حساسية الجسم للأنسولين، وده بيخلي السكر يشتغل بشكل طبيعي أكتر.

مفيد للهضم:

البرغل غني بـ الألياف، ودي أهم حاجة لأي حد بيعاني من إمساك أو مشاكل في الهضم , كمان الألياف بتغذي البكتيريا النافعة في المعدة، وده بيحسن الجهاز الهضمي عمومًا.

بيقلل الالتهاب:

في ناس كتير بتعاني من التهابات مزمنة في الجسم، سواء في المفاصل أو القولون  الدراسات بتقول إن الحبوب الكاملة زي البرغل ممكن تقلل من أعراض الالتهاب لما تدخل في نظامك الغذائي بشكل منتظم.

يحمي من السرطان:

واحدة من أقوى فوائد البرغل إنه بيساعد في الوقاية من سرطان القولون، خصوصًا لأنه مليان ألياف ومضادات أكسدة بتحارب الخلايا السرطانية في بدايتها.

بيطوّل العمر:

أيوه، الدراسات بتقول إن أكل حصة يومية من الحبوب الكاملة ممكن يقلل من خطر الموت المبكر بنسبة 5% وده معناه إنك ممكن تعيش بصحة أحسن ولسنين أطول.

بيشبع بسرعة:

البرغل غني بالألياف، وده بيخليك تحس بالشبع أسرع ولمدة أطول. كمان هو فيه ألياف أكتر من الشوفان، الكينوا، وحتى الرز البني.