قالت سماح عبد الفتاح، الاستشارية الأسرية، إن الخلافات بين الزوجين أمر طبيعي، لكنها أكدت أن الأهم هو طريقة التعامل معاها، وليس الخلاف نفسه، لأن أغلب المشاكل تكبر ليس بسبب الاختلاف، لكن بسبب غياب قواعد واضحة تحكم وقت الزعل.
وأضافت الاستشارية الأسرية، خلال حلقة برنامج "الرحلة"، المذاع على قناة الناس، اليوم الخميس، : "من المهم جدًا إن كل زوجين يتفقوا من أول يوم على إزاي هيتعاملوا لما يختلفوا، لأن الخلافات حاصلة حاصلة، فمش المفروض نسيب نفسنا للتجربة من غير تحضير، لازم نبقى عارفين كويس إن الخلاف مش معناه إننا نقاطع بعض أو نشتم بعض أو نهين بعض، بالعكس، ده وقت الاختبار الحقيقي لمدى احترامنا لبعض".
وأوضحت: "إننا لازم نفهم إن الزعل مش مبرر للكلام الجارح أو لتجاهل الواجبات، ولا معناه إننا نوقف احترامنا أو ننكر المعروف لازم نتفق إن كل كلمة بنقولها وقت الخلاف ممكن تفضل جوه الطرف التاني، وممكن تهد العلاقة كلها حتى لو اتصالحنا بعدين".
وشددت: "الكلام لازم يكون بهدف الفهم، مش الرد أو الانتصار، لأن ده فرق كبير.. وقت الخلاف مش محتاج ناس تكسب، محتاج ناس تحتوي وتفهم بعض، وده مش بييجي غير بالحوار الهادي والاحترام المتبادل".
وأضافت إن الشكوى لازم تبدأ بين الزوجين، مش من طرف لطرف خارجي، قائلة: "ما ينفعش شريك حياتك يسمع شكوتك من بره، قبل ما يسمعها منك، جربوا تفهموا بعض الأول، واتكلموا بصدق وهدوء".
وحذرت من خطورة التراكمات: "الخلاف اللي ما بيتحلش بيتحول لحاجة مكبوتة، ولما بيخرج، بيخرج عنيف جدًا، علشان كده لازم نخلص خلافاتنا أول بأول، ولو مش قادرين دلوقتي، نبرد ونرجع نتكلم تاني، لكن ما نسيبهاش معلقة، والكلمة الطيبة وقت الزعل ممكن تكون سبب في هدوء كبير وفتح باب للصلح، وإن الحفاظ على الود حتى وقت الخلاف بيخلي البيت أحن وأقوى".
