بدل ما ترمي بذور المانجو بعد الأكل، ممكن تزرعها وتحوّلها لشجرة جديدة تزين بيتك أو حديقتك، بخطوات سهلة ومكونات بسيطة متوفرة في كل بيت.
ابدأ بوضع بذور المانجو في ماء نظيف لمدة 5 أيام، وتخلّص من أي بذرة تطفو على السطح لأنها غير صالحة للزراعة. بعد كده، اكسر القشرة الخارجية الصلبة بحذر علشان تطلع النواة اللي جواها.
لف النواة في قطعة قماش نظيفة مبللة بالماء، وحطها في كيس بلاستيك أو علبة محكمة الغلق. بعد أسبوع، افتح الكيس واغسل النواة والقماشة بمياه نظيفة، وارجع حطها تاني لمدة أسبوع كمان لحد ما تبدأ تطلع الجذور.
بعد ما تشوف الجذر طالع، ازرع النواة في قصيص زرع أو كيس بلاستيك مثقوب من الأسفل لتصريف المياه الزائدة، وحطها في مكان فيه شمس مباشرة. خلال حوالي عشرة أيام، هتبدأ تظهر الأوراق الخضراء الأولى.
الخطوات دي البسيطة ممكن تخليك تزرع شجرة مانجو جديدة بدل ما ترمي البذور في القمامة، وتستمتع بثمارها بعد سنوات قليلة من العناية والمتابعة.
