مع دخول فصول انتقالية وتقلبات الجو، يعاني كثير من الناس، خاصة مرضى الحساسية والجيوب الأنفية، من أعراض مزعجة قد تؤثر على حياتهم اليومية، لذلك، من المهم اتباع بعض النصائح البسيطة اللي ممكن تفرق معاك جدًا وتخفف من حدة الأعراض. 

إليك أهم النصائح 

-استنشق بخار الماء

البخار بيشتغل على ترطيب المخاط في الأنف، وده بيساعد بشكل كبير في تخفيف أعراض الاحتقان ويخليك تحس براحة أسرع.

-غسل الأنف بالماء المالح الدافئ

خطوة بسيطة لكن فعالة جدًا! بتقلل من تأثير المهيجات زي الأتربة والتلوث والعطور، وكمان بتخفف من احتقان الجيوب الأنفية.

- ابتعد عن دخان السجائر

السجائر والتدخين السلبي بيضاعفوا فرص الإصابة بالتهاب الجيوب المزمن، وكمان بيصعّبوا العلاج جدًا. فلو بتدخن حاول تقلل أو تبطّل، ولو حواليك مدخنين تجنب الأماكن دي.

- متخرجش إلا للضرورة، ولو خرجت البس كمامة  

الهواء المليان تراب ورياح محملة بمهيجات ممكن يزيد من الأعراض، والكمامة هنا بتكون خط الدفاع الأول لأنفك.

- استخدم أدوية الحساسية أو البخاخات المناسبة

خد أدويتك بانتظام، وخاصة بخاخات الأنف اللي فيها مادة الستيرويد، لأنها فعالة جدًا في تقليل أعراض التهاب الجيوب الأنفية.

- اشرب مياه كتير 

الترطيب مهم جدًا، لأنه بيخلي المخاط أقل لزوجة وأسهل في الخروج، وده بيريحك من الشعور بالاحتقان.

- قلل أو ابعد عن الكافيين 

رغم إنك ممكن تكون بتحب قهوتك، الكافيين ممكن يزود التهاب الجيوب وتهيّجها، فحاول تستبدله بمشروبات دافئة مهدئة زي النعناع أو البابونج.

أ.د أحمد بشير - أستاذ الأمراض الصدرية جامعة الأزهر