وجهت الدكتورة مي أحمد الشحات، مدرس الاقتصاد المنزلي بجامعة حلوان، رسالة تفاؤل وأمل لكل من يرغب في بدء مشروع جديد أو تحويل بيته إلى أسرة منتجة، مؤكدة أن التحديات والعقبات أمر طبيعي جدًا في بداية أي تجربة، لكن الأهم هو الاستمرار والتعلم وعدم الاستسلام.
وقالت مدرس الاقتصاد المنزلي بجامعة حلوان، خلال حوار مع الإعلامية زينب سعد الدين، ببرنامج "البيت"، المذاع على قناة الناس، اليوم الأربعاء: "خلونا ناخد جرعة تفاؤل كده، طبيعي جدًا إن أي مشروع في بدايته يواجه صعوبات، سواء لعدم الخبرة، أو لأن التجربة جديدة، أو حتى بسبب السن أو البيئة، لكن ده مش معناه إنك تفشل، لأ، معناه إنك تبدأ تتعلم".
وأضافت: "أول خطوة إنك تدرس السوق وتفهم عملاءك حتى لو المنتج ما تباعش في البداية أو فضل فترة، ما تيأسش، اسأل الناس اللي سبقوك، خُد من تجاربهم، شوف وقعت في إيه وابتدي صحح، ده طبيعي جدًا، حتى أكبر الشركات في العالم مرت بتحديات وسقطات قبل ما تنجح".
وشددت د. مي على أهمية المرونة في التعامل مع السوق، قائلة: "ممكن أكون ببيع منتج غالي في مكان ما يناسبوش، أو العكس، أبتدي أغير في طريقة التوزيع، في الأماكن، في شكل المنتج نفسه... وأتعلم من كل مرحلة".
وأكدت أن النجاح لا يأتي دفعة واحدة، بل يحتاج إلى صبر وتجربة، موضحة: "ادّي لنفسك فرصة، متقولش مش عارف، الطفل لما بيبدأ يمشي وبيوقع، بنشجعه يكمل، مش بنمنعه، نفس الشيء في المشاريع، كل سقوط بيقوّيك لو تعلمت منه، ودوّنت أخطائك علشان ما تكررهاش".
تابعت: "مافيش حاجة اسمها مشروع فاشل، في شخص يائس، في شخص استسلم، وفي شخص كمل وتعلم.. طول ما في احتياج لمنتجك، فالمشروع هينجح".
