ينشر موقع "اجرى نيوز" الإخباري معلومات ونصائح من قبل قسم بحوث تربية الدواجن التابع لمعهد بحوث الإنتاج الحيواني ..مركز البحوث الزراعية وزارة الزراعة، حول أسباب المشاكل المرضية للدواجن في الشتاء وطرق الوقاية .
اكتر فترة بيحصل فيها مشاكل مرضية خصوصا في الشتاء هي الفترة بعد عمر ٢١ يوم وحتى عمر ٢٨ يوم لعدة أسباب جوهرية أهمها
١- انخفاض المناعة الامية اللي بتحمى الكتاكيت خلال اول عمر ١٤ - ٢١ يوم دون تكوين مناعة من التحصينات كافية للحماية وده بيسبب حدوث فجوة مناعية خلال الفترة دي بيدخل خلالها الامراض.
٢- تغيير نوع العلف من بادى لنامى وده بيكون مصحوب بتغير في الخواص الكيمائية والفيزيائية للعلف وبالتالي بيحصل خلل في التوازن الميكروبى وبيخلى البكتيريا الضارة تتفوق على البكتيريا النافعة وبكدة بتقل المناعة الموضعية للجهاز الهضمي في مقاومة الامراض وكمان بيعمل بعض الاجهاد على الطيور وده بدوره بيضعف المناعة.
٣- تغيير كسوة الفراخ من الزغب الى الريش وده بيسبب اجهاد على الطيور وكمان بيخلى عزل الحرارة ضعيف وبتكون الفراخ حساسة جدا خصوصا لانخفاض حرارة العنبر .
بعد 28 يوم بتقل حساسية الطيور للبرودة لان الريش بيكون اكثر تطورا وكمان بتتكون درجة مقبولة من المناعة المكتسبة اللى بيكونها الجهاز المناعى للطيور وبالتالى بتقل الى حد ما قابلية الطيور للاصابة بالامراض ...وعلشان كدة لو مر الاسبوع ده بدون مشاكل... يبقى بنسبة كبيرة الدورة مرت على خير لتفادى وتقليل المشاكل خلال الفترة دي
١- تجهيز الفراخ بالتحصينات المناسبة وفى الوقت المناسب لتوفير اقصى درجة حماية ممكنة خلال الفترة دى ولتجنب تكوين فترة فراغ مناعي
٢- تغيير العلف من بادى لنامى يكون تدريجي ( الاحلال بالثلث )
٣- استبعاد أي فراخ ضعيفة او تحت الوزن على عمر٢١ يوم وحطها في حاجز مستقل
٤- تجنب الإجراءات الطبية العنيفة زي التحصين او الحقن خلال الفترة دى
٥- استخدام جرعة بروبيوتك مع تغيير العلف لإعادة التوازن الميكروبي للأمعاء
٦- ضبط ظروف التربية من حرارة ورطوبة وفرشة لتقليل الاجهاد على الطيور
٧- وضع برنامج امان حيوي قوى يضمن عدم دخول اى معدات او سيارات بدون تطهير مناسب او اشخاص قد تكون مصدر للعدوى
٨- عدم الاسراف في استخدام المضادات الحيوية وخصوصا المثبطة للجهاز المناعي خلال الفترة دي الا بتوصية طبية
٩- اختيار علف جيد يكون خالي من السموم الفطرية وتخزينه بشكل جيد
١٠- المتابعة الجيدة للمزرعة وإبلاغ طبيبك المشرف باي تغير في الحالة الصحية العامة لإعطاء الفرصة للتشخيص المبكر والعلاج السريع لأى حالة مرضية قبل تفاقمها .
