كتير من البنات بتعاني من مشاكل الشعر، وأبرزها تكسر الشعر اللي بيحصل بسبب طرق الفرد الغلط أو عوامل تانية، وده طبعًا بيأثر على شكل الشعر وبيخليه مش حلو, عشان كده، نادية محمد، خبيرة التجميل، بتقدملك شوية نصايح مهمة عشان تحمي شعرك من التكسر وتحافظي على جماله.

إزاي تحمي شعرك من التكسر؟ 5 طرق فعالة

ابعدي عن الحرارة المباشرة: حاولي تقللي قدر الإمكان من استخدام مكواة الفرد أو السيشوار على شعرك بشكل مباشر, الحرارة العالية بتدمر بصيلات الشعر وبتخليه أضعف وعرضة للتكسر.

استخدمي مشط واسع: لما تيجي تسرحي شعرك، استخدمي مشط أسنانه واسعة وسرحي شعرك بالراحة وبالهدوء، خاصة لو شعرك مبلول. المشط الضيق بيشد الشعر وبيقطعه.

قصي أطراف شعرك بانتظام: قصي أطراف شعرك كل 6 لـ 8 أسابيع, الخطوة البسيطة دي بتساعدك تتخلصي من الأطراف المتقصفة اللي بتخلي الشعر شكله مش صحي وبتسهل تكسره.

كلي أكل غني بالفيتامينات والمعادن: الأكل الصحي بيفرق كتير في صحة شعرك, ركزي على الأطعمة الغنية بالفيتامينات والمعادن اللي بتغذي الشعر من جوه وبتخليه أقوى.

اشربي مياه كتير: ترطيب الجسم من جوه بينعكس على ترطيب الشعر, اشربي كميات كافية من المية طول اليوم عشان تحافظي على شعر رطب وصحي.

نصايح إضافية لشعر أقوى وأجمل

عشان تحافظي على شعرك دايمًا مترطب وقوي، لازم تعملي كام حاجة تانية:

ترطيب مستمر: حافظي على ترطيب شعرك باستمرار باستخدام الكريم المناسب لنوع شعرك.

حمامات زيت وكريم: واظبي على استخدام حمام الزيت وحمام الكريم مرة كل أسبوع على الأقل عشان تضمني ترطيب عميق لشعرك.

نظام غذائي صحي: كلي خضروات وفاكهة طازجة كتير. النظام الغذائي الصحي بيعالج مشاكل الشعر من جذورها وبيحافظ على جمال شعرك بشكل عام.

بشويه اهتمام بسيط، تقدري تتغلبي على مشكلة تكسر الشعر وتستمتعي بشعر صحي ولامع طول الصيف.