الزراعة في البيت بقت هواية ناس كتير بتحبها، وده مش بس علشان شكل الزرع الحلو اللي بيزيّن المكان، لكن كمان علشان ليه فايدة كبيرة، زي تنقية الهوا، وتحسين المزاج، وكمان ممكن نزرع خضار وفاكهة نستخدمها في الطبخ ونتأكد إنها صحية ونضيفة، غير كده، الزراعة في البيت بتوفر فلوس وبتخليك تحس بإنجاز لما تشوف زرعتك بتكبر قدامك.

إزاي نزرع في البيت؟
طرق الزراعة بتختلف حسب نوع الزرع، ودي أشهر الطرق:

•الزراعة بالبذور: ودي أبسط طريقة، بتجيب البذور اللي عايز تزرعها وتحطها في التربة وتهتم بيها بالمية والسماد.
•الزراعة بالشتلات: بتشتري شتلة صغيرة وجاهزة من المشتل وتزرعها على طول.
•الزراعة بالعُقلة: دي طريقة محتاجة خبرة شوية، وبيستخدمها المزارعين أو الناس اللي عندهم خلفية زراعية.

محتاج إيه علشان تزرع في البيت؟
1- أدوات الزراعة:

أهم حاجة في الزراعة هي الأحواض أو الأصص، ودي ممكن تكون بلاستيك، أو فخار، أو معدن، أو خشب. وانت بتختار الحوض، خليك فاكر:
•لازم يكون فيه فتحات من تحت علشان ميّة الزيادة تنزل.
•حجم الحوض لازم يناسب حجم الزرعة اللي هتحطها.

2-التربة:

فيه 3 أنواع ممكن تستخدمهم:
•تربة طينية: بتلاقيها عند المشتل.
•تربة رملية: بتجيب رمل وتغربله، وبعد كده تحمصه علشان يتعقم.
•تربة صناعية: ودي بتشتريها من أي محل زراعي.
أحسن تربة تزرع فيها هي التربة المخلوطة، اللي بتكون مزيج من التلاتة دول.

3- الأسمدة (المخصبات):

•كيميائية: بتشتريها من المشتل وبتسأل على الكمية حسب نوع الزرعة.
•عضوية: ممكن تعملها في البيت بسهولة، زي:
•قشر الخضار بعد ما ينشف ويتطحن ويتخلط مع ميّة الري.
•قشر البيض المطحون.
•تفل الشاي أو القهوة، بتحطه في التربة قبل ما تسقي.

نصايح مهمة وانت بترعى زرعتك:

•اعرف الأول نوع الزرعة وطريقتها قبل ما تبدأ.
•لما الزرعة تكبر، حطها في وعاء أكبر.
•اسقيها الصبح بدري أو قبل المغرب، علشان الميّة متتبخرش.
•استخدم السماد العضوي كل 10 أيام.
•أما السماد الكيميائي، فخلي استخدامه حسب كلام الراجل بتاع المشتل.