من الأربعاء 15 يوليو ولمدة لا تقل عن 10 أيام, تعاون بين مركز معلومات تغير المناخ وهيئة الأرصاد الجوية المصرية
الجو بيقول إيه؟
موجة حرّ قوية جدًا مع ارتفاع غير مسبوق في الطاقة الحرارية، وده معناه إن كل كائن حي في الأرض (بشر، زرع، طير، حيوان) هيحس بحرارة أكبر من الأرقام اللي بنسمعها.
درجات الحرارة المتوقعة:
القاهرة والدلتا: 41° م
مصر الوسطى والصعيد: 42° م
جنوب الصعيد: 43° م
ومع الرطوبة العالية، الإحساس بالحرارة هيزيد من 2 - 3 درجات إضافية!
رياح نشطة (40 - 45 كم/س) على:
السلوم – مطروح – العلمين – الإسكندرية
موج عالي (1 – 2 متر):
في البحر المتوسط وخليج السويس والبحر الأحمر
شبورة مائية كثيفة صباحًا من 4 إلى 7 صباحًا
خد بالك لو بتنقل محصول أو ماشي على الطرق الزراعية في الوجه البحري وشمال الصعيد
ليه الجو ده أخطر من المعتاد؟
لأن الشمس دلوقتي شبه عمودية على مدار السرطان (يعني فوق أسوان)،
وبتبعت أشعة قصيرة الموجة = بتخترق الغلاف الجوي بسهولة =
لسعات للثمار
ضربات شمس للبشر
وإجهاد شديد للنبات
يعني 40° في يوليو = أخطر بكتير من 40° في مايو!
التوصيات_الزراعية_الضرورية
الكلام الجاي ده مش رفاهية… ده عصب الموسم
رسالة_1 | الري الصح = زرع مرتاح
قرب الري للمحاصيل الجديدة والمشاتل
لو ري بالتنقيط: اقسمه مرتين (صباحًا + مساءً)
ما ترويش وقت الظهر (إلا لو ري بالطاقة الشمسية)
رسالة_2 | وقف "التنفيل" في الخضر
عندك خيار – طماطم – فلفل – باذنجان؟
لو العقد الصغير بيقع:
رش صباحًا بمحفزات نمو + أحماض أمينية
وقف الأزوت فورًا
زوّد نترات البوتاسيوم
رسالة_3 | تغذية المحاصيل في مرحلة العقد
ذرة – قطن – فول – عباد – سمسم – سوداني:
سلفات بوتاسيوم (10 – 12 كجم)
بالتبادل مع سلفات ماغنسيوم (6 – 8 كجم)
على ريتين متتاليتين (نصف الكمية لو ري تنقيط)
رسالة_4 | دودة الحشد… عدو الموسم
افحص الذرة والقصب والرفيعة
الجو الحالي مناسب جدًا لظهور أجيال الصيف الشرسة
استخدم مبيد فيه إماميكتين بنزوات
رسالة_5 | المنّ والندوة العسلية
لو عندك إصابة في الذرة الرفيعة:
رش (لمبادا 10%) + (جاوشو 70%)
ولو النبات كبير: حطهم في برميل على وش الرية
رسالة_6 | نخيل التمر
رش وقائي ضد دودة البلح الصغرى
فحص سوسة النخيل
طهر الفسائل قبل الزراعة كويس
رسالة_7 | تحجيم الثمار… بشكل آمن وذكي
للمانجو – التين – الرمان – الزيتون – البلح – الكمثرى
زود التسميد حتى 10 لتر للفدان في الأسبوع
رش: سترات بوتاسيوم (10 – 15 جم/لتر) + سيتوكينين 4%
للرمان: رش جبرليك 100 – 150 جزء في المليون + نترات بوتاسيوم 1%
رسالة_8 | حماية الثمار من الشمس
رش الثمار (خاصة المعرضة للشمس) بـ:
جير مطفي (20 جم/لتر)
أو بيورشات (كربونات كالسيوم)
رسالة_9 | احذر من الحريق
مخلفات زرع؟ حطب جاف؟
ابعدهم عن الشمس والمولدات والمخازن المغلقة
وفر تهوية كويسة… الحر ممكن يولعهم ذاتيًا
ختامًا:
احنا في عزّ "امتحان" مناخي للزراعة
والموجة دي مش عادية… وبتأثر على كل نقطة مية وكل ثمرة وكل عرق طالع من الأرض
التزم بالنصائح… وقوّي مناعتك الزراعية
التزم بالري السليم… وخلي بالك من الصبحية والليل
متستناش المصيبة تحصل… افحص وامنعها قبل ما تبدأ
تغير المناخ مش خيال… إحنا فيه دلوقتي!
ولو ظهرت أي أعراض غريبة في الزرع... كلّمني على الواتس فورًا
أستاذ دكتور محمد علي فهيم
رئيس مركز معلومات تغير المناخ
مركز البحوث الزراعية
