الترمس مش مجرد تسالي بنحب ناكلها في الخروجات أو على البحر، ده كمان فيه فوائد صحية كتير ناس كتير مش واخدة بالها منها، لأنه غني بالبروتين، والألياف، ومفيد للقلب والجهاز الهضمي.

في التقرير ده، هنعرفك على أهم الفوائد الصحية للترمس، حسب ما ذكر موقع Healthline:

 أهم فوائد الترمس لصحة الجسم:

1. مفيد للقلب وبيساعد في تنظيم ضغط الدم

الترمس فيه بوتاسيوم وماغنسيوم، وهما مهمين جدًا لضغط الدم. كمان مفيهوش صوديوم كتير، فده بيخليه مناسب للي عندهم
ضغط عالي. والألياف والبروتين النباتي اللي فيه كمان ممكن يقللوا من خطر الإصابة بأمراض القلب.

2. بيشبع وبيساعد في خسارة الوزن

الترمس فيه حوالي 40% بروتين، يعني أكتر من الفاصوليا والعدس. ومع الألياف اللي فيه، بيساعدك تحس بالشبع لفترة طويلة، وده
ممكن يساعد في تقليل الأكل، وخسارة الوزن وتحسين الهضم كمان.

3. بيساعد على الهضم وبيمنع الإمساك

الترمس فيه نوع من الألياف اللي بتحسن حركة الأمعاء وبتمنع الإمساك. وكمان بيساعد في تحسين البكتيريا النافعة في الأمعاء، وده
مفيد للمناعة وكمان للصحة النفسية.

4. مفيد لمرضى السكر

فيه نوع خاص من البروتين بيساعد في تنظيم مستويات السكر في الدم. الدراسات بتقول إن الترمس ممكن يخلي الجسم أكثر استجابة للأنسولين، وده بيساعد في تقليل السكر، خصوصًا عند مرضى النوع التاني من السكري.

 نصيحة:

لو هتعمل الترمس في البيت، لازم تعرف الطريقة الصح لإزالة الطعم المر قبل الأكل علشان تستمتع بطعمه وفوايده.