كتير من الناس بيعانوا من أمراض مزمنة، والسبب بيكون غالبًا نظام الأكل الغلط. بس في حاجة اسمها "الأكل النظيف" أو Clean Eating، واللي بيلعب دور كبير في تحسين الصحة والوقاية من أمراض كتير – وده من خلال شوية عادات بسيطة في يومك.

وفي السطور الجاية، هيقدملك موقع " اجري نيوز " أهم العادات اللي تدعم أسلوب الأكل النظيف، وده حسب نصائح "كليفلاند كلينك":

 عادات يومية بتخلي أكلك أنضف وصحتك أحسن
1. كل فواكه وخضار طازة كل يوم

خبراء التغذية بينصحوا بـ 5 حصص يوميًا من الخضار والفواكه، خاصة لو كانت طازة أو مطهوة على البخار. ليه؟ لأنها مليانة ألياف، فيتامينات، ومعادن، وبتنظف جسمك من السموم وتقوي مناعتك.

2. اشرب ميه كتير

المية هي الأساس بترطب الجسم، بتحسن الهضم، وبتنظف الكلى. حاول تبعد عن العصاير المصنعة والمشروبات الغازية، واستبدلهم بالمية، الشاي الأخضر، أو ميه منكهة طبيعيًا (زي شرايح ليمون أو خيار).

3. قلل السكر والملح

الإفراط في السكر والملح بيأثر على القلب والضغط وبيسبب أمراض زي السكري. بدل كده، استخدم بدائل طبيعية زي العسل، الأعشاب، والتوابل، وبكميات معتدلة.

4. اقرأ اللي مكتوب على المنتجات

وانت بتشتري أي منتج، بص كويس على المكونات. لو فيها حاجات مش فاهمها أو مش قادر تنطقها، غالبًا مش صحية. ابعد عن أي منتج فيه سكريات مضافة، نكهات صناعية، أو دهون مهدرجة.

5. حضّر أكلك في البيت

من أهم عادات الأكل النظيف إنك تعمل أكلك بنفسك. كده هتتحكم في المكونات وتقلل السكر، الملح، والزيت. وكمان هتستخدم حاجات طازة من غير مواد حافظة أو إضافات مضرة.