القراقيش من الوصفات المصرية الأصيلة اللي بتجمع العيلة على الفطور أو الشاي، وتعتبر بديل ممتاز للمخبوزات الجاهزة. وصفة اليوم هتكون لقراقيش هشة ودايبة بطعم الشمر والينسون، وممكن تتحكموا في قرمشتها على حسب تفضيلكم بين السمن والزيت.

المكونات:

1 كيلو دقيق (حوالي 7 أكواب معيارية)
رشة ملح
4 ملاعق كبيرة سمسم محمص (40 جرام)
3 ملاعق كبيرة نشا (30 جرام)
ملعقة ونصف كبيرة خميرة فورية (15 جرام)
3 ملاعق كبيرة سكر بودرة (30 جرام)
ملعقة صغيرة بيكنج بودر
ملعقة كبيرة شمر (4 جرام) – يمكن تقليلها حسب الرغبة
ملعقة كبيرة ينسون (4 جرام) – يمكن تقليلها حسب الرغبة
ربع ملعقة صغيرة ريحة كحك (اختياري حسب الذوق)
كوب وثلث سمنة سايحة (300 جرام)
كوب زيت (200 جرام)
كوب ونصف ماء دافئ (للعجن – يضاف تدريجيًا)

 ملاحظة:

النسبة الكاملة للدهون = 500 جرام.
لو بتحبي القراقيش "دايبة" اكتر، خلي كل الدهون من السمنة.
ولو بتحبيها ناشفة ومقرمشة، استخدمي زيت فقط.
الوصفة هنا متوازنة بحيث تكون دايبة شوية ومقرمشة شوية.

 الخطوات:

في وعاء عميق، اخلطي الدقيق مع رشة الملح، السمسم، النشا، السكر البودرة، الخميرة، البيكنج بودر، الشمر، الينسون، وريحة الكحك (لو هتستخدميها).

أضيفي السمنة والزيت على الخليط، وابدئي في خطوة "البَسّ": افركي المكونات مع الدهون جيدًا براحة إيدك لحد ما الدقيق يتشرب السمنة ويكون شكله رملي.

لو عندك عجان، استخدمي كف العجن وشغليه 5 دقائق.

أضيفي الماء الدافئ بالتدريج، وابدئي العجن لحد ما تحصلي على عجينة ناعمة وطرية ما بتتشققش.

غطي العجينة وسيبيها تختمر في مكان دافئ لمدة ساعة أو حتى يتضاعف حجمها.

أثناء التشكيل، لو العجينة بردت أو السمنة جمدت، سخنيها بحرارة إيدك فقط وارجعي شكليها.

شكلي القراقيش حسب الحجم والسمك اللي تحبيه.

رصي القراقيش في صينية مبطنة بورق زبدة أو مدهونة خفيف، وسيبيها ترتاح 10 دقائق.

دخليها فرن سخن مسبقًا على درجة حرارة 180-200 درجة مئوية، واخبزيها لحد ما تاخد لون ذهبي جميل.

اتركيها تبرد تمامًا قبل الحفظ.