كشف خبير طهي عن السر الحقيقي وراء نجاح طبق الكشري المصري، مؤكدًا أن الاختلاف الأهم يكمن في تحضير كل مكون على حدة، وليس طهي جميع المكونات في حلة واحدة.

وقال الخبير، في تصريحات خاصة: "أنا من الناس اللي مش مقتنعة خالص إن الكشري يتعمل في حلة واحدة… لازم كل حاجة لوحدها عشان الطعم يضبط والريحة تفوح ويبقى أحلى من كشري الشارع كمان".

صلصة الكشري: "الدمعة" السرية

أوضح الخبير أن الصلصة تُعتبر أهم عنصر في الكشري، وكشف عن تريكتها السحرية قائلًا: "تشوحي بصلة صغيرة لحد ما لونها يصفر، وبعدها تنزلي بفص ثوم مدبوغ وشوية كزبرة ناشفة، أول ما ريحة الثوم تبدأ تطلع على طول تنزلي بربع كوبية خل – ودي أهم تريكة – هتلاقي الريحة فاحت بشكل رهيب، بعدها تنزلي بعصير الطماطم وتسيبيها تتسبك على نار هادية مع شوية ملح من غير أي إضافات تانية".

وأضاف أن هذه الطريقة تُنتج ما يشبه "الدمعة" الموجودة في كشري المحلات الكبرى.

الدقة: خلطة تضرب في الدماغ

أما بالنسبة للدقة، فنصح الخبير بتشويح شوية ثوم صغيرين، ثم إضافة معلقة شطة، ثم ربع كوبية خل مع عصير لمونتين كبار وكوبية مية وشوية ملح، تُترك المكونات لتأخذ غلوة واحدة فقط، وفي النهاية تُضاف معلقة من الصلصة المُعدة مسبقًا.

أسرار تحضير باقي المكونات

المكرونة: تُسلق عادي من غير تحمير، وبعد السلق تُشطف جيدًا ويُضاف إليها معلقتين زيت لتحقيق اللمعان ومنع الالتصاق.
الرز بالشعرية: يجب أن تكون الشعرية كثيرة ومحمرة جيدًا قبل إضافة الرز.

العدس: يُسلق نصف سلقة فقط لتجنب العجن.
الحمص: يُسلق ويُظبط جيدًا.
سر البصل المحمر المقرمش 


كشف الخبير عن تريكة البصل المحمر قائلًا: "تقشري البصل وتقطعيه شرايح، وتدي له رشة ملح ومعلقتين كبار دقيق وتقلبيه كويس في الدقيق، وبعد كده تنزليه في الزيت – مش سمنة – بس أهم حاجة تنزليه على مراحل مش مرة واحدة، شوية شوية علشان يتحمر صح ويبقى مقرمش ولونه دهبي جميل".

الخلاصة: كل مكون لوحده

وشدد الخبير في النهاية على أهم قاعدة: "ما تجمعيش كل ده في حلة واحدة! كل مكون لوحده هو اللي بيديكي الطعم الصح اللي يخلي الكشري بتاعك مميز بجد. جربي التريكات دي… وهتشوفي الريحة قبل الطعم هي اللي هتتكلم عنك".