في أوقات كتير تحتار ست البيت في تحضير وجبة الغداء، خصوصًا لما يكون اليوم زحمة أو مشغولة. وعلشان كده، يعتبر السجق المدخن من أسهل وأسرع الأكلات اللي ممكن تتحضر بسرعة وطعمها شهي، بيحبه الكبار والصغار.

في السطور الجاية هنقدملك طريقة عمل السجق المدخن خطوة بخطوة زي المطاعم، بمكونات بسيطة ومتوفرة في كل بيت.

 مكونات السجق المدخن:

نصف كيلو سجق مدخن (مقطع شرائح مائلة أو دوائر)

بصلة كبيرة مقطعة شرائح رفيعة

فلفل رومي أخضر أو ألوان (حسب المتوفر)

2 فص ثوم مفروم

2 ملعقة كبيرة زيت

1 ثمرة طماطم مبشورة

2 ملعقة كبيرة صلصة طماطم

رشة ملح + رشة فلفل أسود

رشة بابريكا أو شطة (حسب الرغبة)

نصف ملعقة صغيرة بهارات لحمة (اختياري)

 طريقة التحضير:

سخني الزيت في طاسة كبيرة على نار متوسطة.

ضيفي شرائح البصل وقلّبيها لحد ما تذبل وتاخد لون دهبي خفيف.

ضيفي الثوم المفروم وقلّبيه نص دقيقة بس لحد ما تطلع ريحته.

حطي السجق المدخن وقلّبيه كويس لحد ما يبدأ يتحمّر.

ضيفي الفلفل الرومي وكملي التقليب.

بعد كده، ضيفي الطماطم المبشورة والصلصة، وقلّبي المكونات مع بعض.

دلوقتي حطي البهارات: ملح، فلفل، بابريكا أو شطة، وبهارات اللحمة، وقلّبي كويس.

غطي الطاسة، وسيبي الخليط يتسبك على نار هادية لمدة 10 دقايق.

وقدّميه مع عيش بلدي أو في سندوتشات مع بطاطس محمرة.

ممكن كمان يتاكل مع رز أبيض أو مكرونة كوجبة غدا خفيفة ومتكاملة.