خلينا نتكلم بصراحة شوية، ونركن الكلام المعسول على جنب، كلنا بنحب نعيش قصة حب حلوة، فيها اهتمام ورسائل لطيفة و"وحشتيني" من وقت للتاني، بس مهما كان الحب كبير، فيه حاجة اسمها حدود..

لإن اللي مافيهوش حدود، بيضيع، واللي بيفقد احترامه… مهما كان جميل، عمره ما هيكمل.

وبعيدًا عن المسميات الكبيرة، خليني أقولك من البداية:
إحنا مش عايشين في أوروبا… إحنا في بلد شرقية، ومسلمين، وبنخاف ربنا، يعني طبيعي نحافظ على نفسنا، وعلى قيمنا، ونخلي العلاقة ماشية في النور، وبالاحترام.


مش كل حاجة نبررها بكلمة "بحبك" تبقى مسموح بيها، ومش كل اقتراب يبقى اهتمام.

أنا بحب الحب، أيوه… وبحب الدفا والكلمة الطيبة ونظرة الراحة، بس مش على حساب كرامتي، ولا ديني، ولا ثوابتي.

الحب مش اختبار للنوايا… ولا مغامرة مفتوحة.

فـ قبل ما تقولي "بحبك"، وقبل ما تبدأ تكلمني عن الارتباط، خليني أسألك ببساطة: إيه الـ limits بتاعتك؟ أو هي ايه حدودك.

بتغير؟ حلو، بس الغيرة مش تحكم.
بتسأل؟ تمام، بس مش كل ساعة تحقيق.
بتحب تطمّن؟ ده شيء جميل جدًا، بس من غير ما تحاصرني أو تحاسبني على النفس اللي أخدته وأنا بعيده.


أنا عايزة علاقة فيها طمأنينة مش توتر، احترام مش تملك… صدق مش تمثيل، وشراكة… مش تحدي مين يسيطر على مين.

أنا عايزة حد يمشي جنبي، مش يسبقني ولا يجرني.
حد يشوف فيّ إنسانة لها عقل وقلب… مش مجرد حد بيكمل معاه الصورة.

فـ قبل ما تحبني… قولي بصدق، إيه حدودك؟
علشان أعرف: إحنا نكمل سوا… ولا نكتفي بالسلام.

بقلم
شيماء أحمد متولي
ماجستير الاعلام الرقمي والآمن المعلوماتي