أ
أ
اللازانيا باللحمة المفرومة من أحلى الأكلات الإيطالية اللي كل الناس بتحبها، كبار وصغيرين. أكلة تقيلة ومشبعة، ومناسبة جدًا للعزايم والمناسبات.
تعالي نعرف إزاي تعمليها في البيت بطريقة سهلة وبمكونات بسيطة علي طريقة الشيف نادية السيد
المكونات:
• باكو لازانيا (من اللي مش محتاجة سلق أو اسلقيها لو نوعها بيتسلق)• بصلة مفرومة
• 300 جرام لحمة مفرومة
• معلقة كبيرة ونص صلصة طماطم
• كباية مية
• جزرة مبشورة
• 2 معلقة كبيرة زيت نباتي
• 2 معلقة كبيرة زبدة
• 2 معلقة كبيرة دقيق
• 2 ونص كوب لبن
• كباية جبنة موتزاريلا مبشورة
• معلقة صغيرة أوريجانو
• رشة جوزة الطيب
• ملح وفلفل أسود على حسب الرغبة
طريقة التحضير:
1- في طاسة على النار، حطّي الزيت وسخّنيه، وبعد كده نزّلي البصلة وقلّبيها لحد ما تبقى دهبي شوية.2- ضيفي اللحمة المفرومة وقلّبي لحد ما لونها يتغيّر، وبعدين تبّليها بالملح والفلفل والأوريجانو.
3- حطّي صلصة الطماطم وقلّبي، وبعدين ضيفي المية والجزر المبشور وقلّبي وسيبيهم على النار شوية لحد ما اللحمة تستوي.
4- في حلة تانية، سخّني الزبدة مع شوية زيت، وبعدين ضيفي الدقيق وقلّبيه بسرعة.
5- نزّلي اللبن شوية شوية وإنتي بتقلّبي لحد ما يبقى عندك صوص بشاميل ناعم، وحطّي عليه رشة جوزة الطيب وفلفل أسود.
6- في صينية فرن، حطّي طبقة بشاميل، وبعدين طبقة لازانيا، وبعدها طبقة من اللحمة، وكرّري الطبقات لحد ما تخلصي.
7- آخر طبقة خالص تكون لازانيا وعليها بشاميل، ورشّي فوقها الموتزاريلا.
8- سخّني الفرن على 180 درجة، ودخّلي الصينية حوالي 35 دقيقة لحد ما الجبنة تسيح والوش يتحمّر.
9- طلّعيها وقدّميها سخنة.. وهتاكلي أحلى لازانيا بإيدك.
