في ظل ارتفاع أسعار اللحوم والبحث عن مصادر غذائية آمنة واقتصادية، اتجه عدد كبير من الأسر المصرية لتربية الطيور في المنزل، خاصة الوز والفراخ البيضاء، باعتبارها مشروعًا صغيرًا ومربحًا ويوفر لحوم طازجة للأسرة.

 خطوات البداية مع كتكوت الوز

عند شراء كتكوت الوز، ينصح باختيار كتكوت نشيط، عيونه لامعة، وريشه جاف ونظيف. يجب وضعه في مكان دافئ ومغلق جيدًا من عمر يوم حتى أسبوعين، بدرجة حرارة تبدأ من 35 وتنخفض تدريجيًا حتى تصل إلى 25 درجة.

أول ما توصلي البيت، سيبيه يشرب مياه الأول، وبعدين قدمي له علف بادئ خاص بالبط أو عالي البروتين.

 الوز بياكل إيه وقد إيه؟

الوز معروف بشراهته للأكل، وخصوصًا أول 3 شهور، حيث يتناول من 400 لـ 500 جرام يوميًا.

المياه لازم تكون متوفرة طول اليوم، لأنها ضرورية للهضم، وبتأثر على خصوبة البيض.

الوز كمان بيحب الحشائش زي البرسيم والجرجير وورق الكرنب، وده بيساعد في تقليل كمية العلف المستخدم.

 إمتى الوز بيكبر ويتدبح؟

الوز بينمو بسرعة، وبيبدأ يظهر عليه الحجم الحقيقي من عمر 3 شهور، وبيوصل وزنه في الكبر لـ 6 أو 8 كيلو.

ولو هتربّيه لحم فقط، يفضل تدبحه في عمر من 4 لـ 5 شهور.

 موسم بيض الوز والرقد

الوزة بتبدأ تبيض من سن 8 لـ 9 شهور، والموسم بيبدأ من ديسمبر لحد الصيف، وبتنتج من 30 لـ 60 بيضة في الموسم.

فترة الرقد على البيض بتستمر من 28 لـ 30 يوم. ولازم يتوفر للوزة مكان هادي ومبطن بالقش أو التبن عشان ترتاح.

 بعد الفقس.. الرعاية مهمة

بعد الفقس، بيكون الوز الصغير قوي وسريع، لكن لازم تحطيه في مكان دافي وآمن.

متنقليش العش بعد ما تبدأ الوزة ترقد عشان ما تسيبش البيض، وراعي دايمًا وجود المياه والأكل جنبها.

 نصايح سريعة لتربية الفراخ البيضاء

التهوية ضرورية بس من غير تيارات هوا.

نظفي المكان كل كام يوم بخل أو مطهر بسيط.

لو الفراخ أو الوز بيكح أو يفتح بقه كتير، راجعي التهوية وجودة العلف.
اوز