وصفة ينفع تتعمل للفطار أو العشاء مع الشاي أو حتى تتحضّر قبل الشغل أو المدرسة, مكوناتها بسيطة ومتوفرة.

المكونات:

خبز تورتيلا أو عيش شامي أو رقاق طري أو جلاش (أي نوع متوفر عندك)
حشوات حسب الرغبة: ببروني / بسطرمة / لانشون / جبنة / لحمة مفرومة / شاورما / بواقي فراخ

للتشريبة (الخليط السائل):

3 بيضات
½ كوب حليب
⅓ كوب زيت (زيت ذرة أو عادي)
رشة ملح
رشة فلفل أسود
1 ملعقة كبيرة زبادي (اختياري)
½ كوب جبنة موتزاريلا مبشورة
بقدونس مفروم حسب الرغبة

 طريقة التحضير:
1. تجهيز التورتيلا:

خدي كل قطعة تورتيلا وكشكشيها بإيدك زي المروحة (نفس شكل زمان )
رصيها في صينية مناسبة لحجمها. لو الصينية طويلة، ممكن تحطي القطع بالعرض.

2. الحشو:

احشي كل قطعة بالحشوة اللي تحبيها: ببروني، بسطرمة، لانشون، جبن، لحمة مفرومة... أي حاجة عندك.
الحشوات اللي طعمها قوي هتبقى ممتازة في الوصفة دي.

3. تجهيز التشريبة:

في بولة، اضربي مع بعض: البيض، الحليب، الزيت، الملح، الفلفل، الزبادي، الجبنة، والبقدونس.
قلّبيهم كويس لحد ما المكونات تمتزج.

4. توزيع التشريبة:

قبل ما تسقي الصينية بالخليط، اعملي فتحات بسيطة بالسكينة أو الشوكة في التورتيلا علشان التشريبة تدخل جوه.
اسقي الصينية كلها بالخليط ووزعيه كويس.

5. الخبز:

دخلي الصينية فرن سخن على درجة حرارة 200 على الشبكة في الرف الأوسط.
استني حوالي 15 دقيقة أو لحد ما الجبنة تسيح وتاخد لون خفيف.

 النتيجة:

هتلاقيها نفشت وبقت طرية جدًا وجواها الحشو والتشريبة، وطعمها لذيذ كأنك عاملة ساندوتش متكامل من جوه 
ينفع تتاكل سخنة أو تبرد وتتاخد في لانش بوكس أو فطار سريع.

 نصائح:

ممكن تضيفي خضار زي فلفل ألوان أو زيتون للحشوة.
لو مش عندك تورتيلا، الرقاق الطري أو الجلاش هيشتغلوا كويس جدًا.