المحشي من الأكلات اللي ليها مكانة خاصة في قلوب المصريين، ودايمًا بيكون "نجم السفرة" في أي عزومة أو مناسبة، رغم إن أنواعه مختلفة زي الكرنب وورق العنب وغيرهم، إلا إن الحشوة الأساسية واحدة تقريبًا، والاختلاف بيكون في طريقة اللف والتسوية.

في السطور الجاية، هنعرفك على أسهل طريقة لتحضير المحشي بأنواعه المختلفة في البيت، بخطوات بسيطة وعلى طريقة الشيف هبة أبو الخير.

خلطة المحشي الأساسية
المكونات:

•أرز مصري (منقوع ومغسول)
•بصل مفروم ناعم
•طماطم مبشورة أو معصورة
•ملعقة صغيرة صلصة طماطم
•شبت، بقدونس، وكزبرة خضراء مفرومين
•ملح وفلفل أسود
•بهارات محشي
•زيت نباتي أو زيت زيتون

طريقة التحضير:

1-شوّحي البصل في الزيت لحد ما يذبل.
2-ضيفي عصير الطماطم ومعجون الطماطم، وقلّبي لحد ما تتسبك الصلصة.
3-شيلي الخليط من على النار، وضيفي الأرز والخضرة والبهارات، وقلّبي كويس.

طريقة عمل محشي الكرنب (الملفوف):

1-اسلقي أوراق الكرنب في مياه مغلية مع كمون وملح لحد ما تطرى.
2-صفيها وقطعيها حسب حجم اللفة اللي تحبيها.
3-حطي شوية من الحشوة في كل ورقة ولفيها بإحكام.
4-رصي اللفائف في حلة فيها شرايح بصل أو طماطم في القاع.
5-اسقيها بشوربة سخنة، وسيبيها تغلي شوية، بعدين وطي النار لحد ما تستوي على هدوء.
نصيحة: حطي طبق ثقيل فوق المحشي أثناء التسوية عشان ما يفكش.

طريقة عمل محشي ورق عنب:

1-اغسلي ورق العنب واغليه في مياه سخنة لمدة دقيقتين بس.
2-حطي كمية صغيرة من الحشوة في نص الورقة ولفيها رول.
3-رصي الورق في الحلة طبقات، وبين كل طبقة حطي شرائح ليمون.
4-اسقيه بشوربة سخنة ممزوجة بعصير ليمون، وسيبيه يستوي على نار هادية.
سر الطعم: رشة نعناع ناشف على الشوربة بتدي نكهة مميزة.

التقديم:

•قدّمي المحشي سخن مع زبادي، كفتة، أو فراخ مشوية.
•ورق العنب بيحب عصرة ليمون على الوش.
•والكرنب بيكمل بطعم لحمة الرأس أو الضلوع.

نصائح لنجاح المحشي:

•ما تكتريش الأرز في اللفة، عشان فيه مساحة للتمدد.
•متغطيش المحشي بمياه كتير.. كفاية يدوب تغطيه.
•التسوية على نار هادية هي السر في الطعم والمظهر.