أ
أ
لكل عشاق المخلل، سرّ الزيتون اللي بيبقى هش ومقرمش, ومع الطريقة دي هتحصلي على طعم ولا أروع، وكل ده بمكونات بسيطة وخطوات مضمونة.
المقادير:
الزيتون:• 3 كيلو زيتون أخضر بلدي (يكون لسه طري كده ومفتّح)
• 3 ليمونات كبار متقطعين حلقات
• 3 قرون فلفل أحمر حار متقطعين
• 1 كوب عصير ليمون طبيعي
• 1 كوب زيت زيتون
محلول التخليل:
• ميّه مغلية على قد الحاجة• 1 ونص كوب ملح خشن (ممكن تزودي لو بتحبي المخلل حدق شوية)
• معلقة كبيرة كمون صحيح
• معلقة كبيرة كركم (يدي لون وطعم يجنن)
• معلقة كبيرة كزبرة ناشفة
• معلقة كبيرة روزماري ناشف (اختياري بس بيخلي الريحة فظيعة)
• كوب خل أبيض
التتبيلة السحرية:
• ¼ كيلو فلفل أخضر حار مفروم ناعم• ¼ كيلو فلفل أحمر حار مفروم ناعم
• 6 فصوص توم مفرومين ناعم
• 3 جزرات مبشورين
• حزمة كرفس (الأعواد والأوراق) مفرومة
• حزمة نعناع أخضر فريش مفروم
• حزمة كزبرة خضراء مفرومة
• حزمة شبت أخضر مفروم
طريقة التحضير:
1. نبدأ بالمحلول: في حلة كبيرة، حطي الميّه المغلية، وانزلي عليها بالملح والتوابل كلها. قلّبي لحد ما كل حاجة تدوب وتاخد غلوة. سيبيه يبرد خالص.2. ندخل على التتبيلة: في بولة واسعة، اخلطي الفلفل الأخضر والأحمر مع التوم والجزر، وقلّبيهم كويس. زودي عليهم الكرفس، النعناع، الكزبرة، والشبت، وقلّبيهم بحب كده لحد ما التتبيلة تبقى متجانسة وريحة التوابل تعبّي المكان
3. نرص الزيتون: في برطمان كبير ومعقم، ابدأي بطبقة تتبيلة، بعدها شوية زيتون، وهكذا طبقات لحد ما تخلصي الكمية.
4. نزّلي الإضافات: زوّقي البرطمان بشرائح الليمون والفلفل الأحمر المقطع.
5. نكمّل السوايل: صبي عصير الليمون، وبعدين المحلول البارد، وفي الآخر زيت الزيتون يغطي الوش.
6. قفل البرطمان: غطّي البرطمان كويس، ممكن تحطي كيس بلاستيك تحت الغطا علشان تحكمي القفل. رجّيه كده رجّة خفيفة علشان كله يتوزع.
7. نسيبه يرتاح: خبي البرطمان في مكان هادي وظلمة (دولاب المطبخ مثلًا) لمدة 40 يوم. وكل كام يوم قلّبيه على خفيف كده علشان كل حاجة تاخد من التتبيلة.
8. بعد الـ 40 يوم: هتفتحي البرطمان وتشمّي الريحة.. كل زيتونة هتبقى متتبلة ومزبوطة.
