لو بتدوري على بسكوت سريع وسهل وطعمه يجنن، من غير خلاط ولا معدات، جربي وصفة البسكوت دي هتعمليه بإيدك في نص ساعة، وفعلاً بيدوب في البق، من جماله وطراوته. وكمان تقدرِ تشكليه بطريقتين مختلفين وبأقل مجهود.

 مكونات البسكوت:

½ كوب زيت

½ كوب سمنة ممسوحة + معلقة كبيرة سمنة (ممكن تستبدلي السمنة بزبدة لو بتحبي البسكوت يقرمش)

½ كوب سكر بودرة (مطحون)

صفار بيضة واحدة

1 ½ معلقة كبيرة قهوة سريعة الذوبان (مذوبة في معلقة مية سخنة)

¼ كوب نشا

2 ¼ كوب دقيق (متعاير صح بالمعلقة، ما نكبسهوش في الكوب)

2 ½ معلقة كبيرة كاكاو خام (من غير سكر)

رشة ملح

معلقة صغيرة فانيليا

 طريقة التحضير:

في بولة كبيرة، حطي الزيت والسمنة (أو الزبدة) والسكر البودرة، واخلطيهم كويس جدًا لحد ما يبقى القوام كريمي ولونه فاتح.

ذوّبي القهوة في معلقة مية سخنة، وضيفيها على الخليط وقلّبي.

ضيفي صفار البيضة والفانيليا، وقلّبي تاني.

في بولة تانية، انخلي الدقيق مع الكاكاو والنشا ورشة الملح.

بالتدريج، ضيفي خليط الدقيق على المكونات السايلة، وقلّبي بمعلقة أو بإيدك لحد ما العجينة تلم.

لو العجينة لسه بتلزق، زودي شوية دقيق من اللي احتفظتي بيه على جنب.

لمي العجينة بإيدك بلُطف من غير عجن كتير، وغطيها بفوطة مبلولة أو بلاستيك علشان ما تنشفش.

شكّلي البسكوت بأي طريقة تحبيها:

كرات صغيرة ونبططها، ونضغط عليها بغطا إزازة أو شوكة.

أو نعملها على شكل حبات بن صغيرة ونبططها برضو.

رصي البسكوت في صينية (بورق زبدة أو من غيره)، على درجة حرارة 180 مئوية، وسط الفرن، سخن مسبقًا.

الحجم الصغير بياخد من 12 لـ15 دقيقة.

الحجم الكبير بياخد من 15 لـ20 دقيقة.

متلمسيش البسكوت أول ما يطلع من الفرن، سيبيه يهدى عشان ما يتكسرش.

تأكدي إنه استوى كويس من جوه (ما يكونش فيه لون أغمق).