على عكس معظم مطاعم البيتزا اللي بيركزوا على العجينة الرفيعة، مطعم "سبونتيني" الشهير في إيطاليا قلب المعادلة وقرر يقدم بيتزا سميكة جدًا بطابع فريد, ورغم إن البيتزا الرفيعة لها شعبية، لكن الوصفة دي هتخليك تجرب السُمك بطعم مختلف تمامًا.

الوصفة دي معمولة بعجينة هشة وخفيفة، أقرب للعيش، ومغطّاة بطبقة سخية من الصوص والجبنة الموتزاريلا، واللي يخلي كل قضمة مليانة طراوة وطعم غني, مناسبة للي بيحبوا البيتزا "مليانة حنية" مش بس طعم.

المكونات:
مكونات العجينة:

400 مل ماء دافئ (حوالي كوبين إلا ربع)

1 ملعقة كبيرة سكر

1 ملعقة كبيرة خميرة فورية

500 جم دقيق (حوالي 4 أكواب)

1.5 ملعقة صغيرة ملح

زيت نباتي أو زيت زيتون لدهن الصينية واليدين

مكونات صوص البيتزا:

2 إلى 3 فصوص ثوم مفروم

2 ملعقة كبيرة زيت زيتون

1 كوب عصير طماطم مصفى

1 ملعقة كبيرة معجون طماطم

نصف ملعقة صغيرة زعتر

نصف ملعقة صغيرة ريحان

نصف ملعقة صغيرة ملح

رشة سكر

التوبينج:

جبنة موتزاريلا مبشورة (كمية كبيرة حسب الرغبة)

بيبروني (اختياري)

زعتر وبيبر فليكس للتزيين (اختياري)

طريقة التحضير:
1. تحضير العجينة:

في وعاء، ضيف السكر والخميرة على الماء الدافئ، وقلّبهم، وسيبهم 10 دقائق لحد ما تتكون رغوة.

في وعاء تاني، اخلط الدقيق مع الملح.

صب خليط الخميرة على الدقيق وابدأ بالتقليب بيدك من غير عجن، لحد ما يختفي أي دقيق ناشف.

غطي العجينة وسيبها تختمر في مكان دافئ لمدة ساعة أو لحد ما يتضاعف حجمها.

حضّر صينية مدهونة زيت كويس، وادهن إيدك بالزيت عشان العجينة لزجة، وافرد العجينة في الصينية.

سيبها تستريح 10–15 دقيقة بعد الفرد.

2. تحضير الصوص:

سخّن زيت الزيتون، وضيف الثوم المهروس وقلّبه ثواني.

ضيف عصير الطماطم ومعجون الطماطم والتوابل والسكر، وقلّبهم.

غطّي الصوص وسيبه يغلي على نار هادئة لمدة 10 دقائق.

3. تسوية العجينة:

سخّن الفرن على درجة حرارة 200.

باستخدام شوكة، ابدأ في تخريم العجينة عشان ما تنتفخش زي الكيك.

دخل العجينة للفرن لمدة 10 دقائق تقريبًا لحد ما تبدأ تتحمر من تحت.

4. إضافة التوبينج:

طلع العجينة من الفرن، وافرد عليها الصوص ثم الجبنة الموتزاريلا بكمية سخية.

ضيف البيبروني أو أي توبينج تحبه.

رجّع البيتزا الفرن تاني لحد ما الجبنة تسيح وتبدأ تتحمّر خفيف من الأطراف.

5. التقديم:

طلع البيتزا بحرص من الصينية لأن العجينة هشة.

قطّعها مربعات صغيرة زي بيتزا "سبونتيني".

رش شوية زعتر أو فليكس لو حبيت، واستمتع بأطعم بيتزا منزلية سميكة وهشة!