الكشري المصري من أشهر الأكلات الشعبية اللي ليها مكانة خاصة في قلوب المصريين. طعمه مميز ومشبع، ومكوناته بسيطة بس مليانة نكهات, سواء بتاكله في مطعم أو عامله في البيت، الكشري دايمًا بيكون أكلة تجمع بين الطعم الحلو والريحة اللي تفتح النفس.

في الوصفة دي، هنتعلم إزاي نعمل الكشري زي المحلات بالظبط، من أول البصل المقرمش لحد آخر نقطة من الصوصات اللي بتفرق الطعم، وكمان هنكشف السر اللي بيخلي الصلصة والدقة "تمسك" على الكشري من غير ما تنزل في قاع الطبق.

المكونات الأساسية:
البصل المقرمش:

2 بصل كبير مقطع شرائح (أجنحة)

2 ملعقة كبيرة نشا

زيت غزير للقلي

رشة ملح

العدس:

1 كوب عدس بجبة (أسود)

ماء للسلق

ملح + كمون

المكرونة:

200 جم مكرونة خواتم

200 جم مكرونة سباجيتي (تكسر لنصفين أو ثلاثة)

ماء للسلق

1 ملعقة كبيرة ملح

2-3 ملاعق كبيرة من زيت البصل

الرز بالشعريّة:

½ كوب شعريّة

1½ كوب رز مصري مغسول

2½ كوب ماء مغلي

1 ملعقة صغيرة ملح

زيت البصل

صلصة الطماطم:

4 أكواب عصير طماطم (مصفى)

8 فصوص ثوم مهروس

¼ إلى ½ كوب خل

1 ملعقة صغيرة ملح

1 ملعقة صغيرة كمون

½ ملعقة صغيرة فلفل أسود

½ ملعقة صغيرة سكر

¼ كوب من ماء سلق المكرونة

الدقة:

5 فصوص ثوم مهروس

½ كوب خل

¼ كوب ماء سلق المكرونة

1 ملعقة صغيرة ملح

1 ملعقة صغيرة كمون

زيت البصل

الشطة:

4 ملاعق كبيرة زيت البصل

4 ملاعق صغيرة شطة

2 ملعقة كبيرة من الدقة

½ كوب صلصة (حسب الرغبة في الحِدّة)

 طريقة التحضير:
1. تحضير البصل المقرمش:

قطّع البصل شرائح، وافركه بالنشا.

سخّن الزيت جيدًا، ثم اقلي البصل على دفعات لحد ما يتحمّر ويبقى مقرمش.

صفيه من الزيت، ورش عليه رشة ملح، وسيبه يبرد.

2. تحضير العدس:

اغسل العدس واغليه 10 دقائق، صفيه وبدل المياه.

أضف له ملح وكمون، وسيبه يغلي لحد ما يستوي.

قلبه في معلقة كبيرة من زيت البصل.

3. سلق المكرونة:

اسلق نوعين المكرونة مع ملح وزيت البصل.

خذ كوب من ماء السلق قبل التصفية (هنستخدمه في الصوصات).

صفّي المكرونة وسيبها على جنب.

4. تحضير الرز بالشعريّة:

حمّص الشعريّة في زيت البصل لحد ما تاخد لون ذهبي.

ضيف الرز وقلّبه لحد ما يتغلف بالزيت.

ضيف الماء المغلي، وغطّيه وسيبه على نار هادية لحد ما يستوي تمامًا.

5. صلصة الطماطم:

شوّح الثوم في زيت البصل، ضيف الخل والطماطم المصفاة.

تبّل بالتوابل والسكر.

ضيف ربع كوب من ماء المكرونة.

سيبها تغلي لحد ما تتقل وتبقى غنية بالطعم.

6. الدقة:

شوّح الثوم في زيت البصل، ضيف الخل وماء المكرونة.

تبّل بملح وكمون.

لما تغلي، ارفعها من النار وخزنها في زجاجة سكويز.

7. تحضير الشطة:

في طاسة باردة، ضيف زيت البصل + الشطة.

سخّن بهدوء لحد ما اللون يتحول للأحمر.

ضيف الدقة + الصلصة حسب درجة الحراقة اللي تحبها.

قلّبها كويس، وسيبها تهدى.