مع حرارة الصيف، بيزيد الإقبال على المشروبات الباردة اللي بتنعنش، والآيس موكا يعتبر واحد من أشهر المشروبات اللي بتجمع بين طعم القهوة الغني ونكهة الشوكولاتة اللذيذة، مع لمسة حليب بارد وثلج عشان تنتعش, ممكن كمان تضيف نكهات تانية زي الفانيليا والقرفة عشان تزود حلاوته.

مكونات الآيس موكا:
عشان تعمل آيس موكا بيتي زي الكافيهات، هتحتاج المكونات دي:

كوب ونص قهوة سائلة (نسكافيه).
كوبين حليب سائل كامل الدسم.
نص كوب سكر.
ربع كوب مياه.
معلقتين كبار كاكاو بودرة.
ربع معلقة صغيرة فانيليا سائلة (اختياري).
رشة صغيرة ملح.
شووية كريمة مخفوقة وشوكولاتة مبشورة للتزيين.

طريقة التحضير خطوة بخطوة:

جهز مكعبات القهوة: صب القهوة السائلة (النسكافيه) في قالب مكعبات التلج وحطها في الفريزر لحد ما تجمد تمامًا, ممكن تعمل الخطوة دي قبلها بليلة عشان توفر وقت.

حضر صوص الشوكولاتة: في حلة صغيرة، حط المايه وربع كوب السكر، وبعدين ضيف الكاكاو البودرة ورشة الملح.

سخن الصوص: حط الحلة على نار هادية جدًا وقلّب المزيج لحد ما يسخن وتبدأ فقاقيع صغيرة تظهر على أطرافه.

ضيف الفانيليا: شيل الحلة من على النار وضيف الفانيليا السائلة وقلّب المكونات كويس لحد ما يبقى عندك شراب شوكولاتة مركز.

برد الصوص: غطي الوعاء وحطه في التلاجة لمدة نص ساعة على الأقل عشان يبرد خالص.


اخلط المكونات: طلع مكعبات القهوة المثلجة من القالب وحطها في الخلاط, ضيف عليها باقي كمية السكر، وشراب الشوكولاتة المركز اللي جهزته، والحليب السائل.

امزج كويس: اضرب كل المكونات في الخلاط لحد ما تمتزج تمامًا وتتفتت كل مكعبات القهوة.

قدم المشروب: صب الآيس موكا في أكواب كبيرة ومناسبة للتقديم.

زين وقدم: ضيف لكل كوب معلقة كبيرة من الكريمة المخفوقة ورشة من الشوكولاتة المبشورة للتزيين.