أ
أ
لو بتدوري على أكلة مصرية أصيلة تكمل الصفرة وتجمع العيلة على طعمها المميز، المسقعة على الطريقة المصرية هي الحل، أكلة بسيطة وسهلة، ومكوناتها موجودة في كل بيت، هتحضري طبق غني بالنكهات وكل طعمه دفا وحنين، علي طريقة الشيف نادية السيد.
مكونات المسقعة المصرية:
• 2 باذنجان رومي كبير (اتقطعيه شرائح أو مكعبات).• 2 فلفل رومي أخضر شرائح.
• فلفل حار حسب الرغبة.
• 2 بطاطس شرائح.
• 2 طماطم مقطعة حلقات.
• 5 فصوص ثوم مفروم.
• بصلة مفرومة (اختياري).
• 2 كوب عصير طماطم.
• ملعقة كبيرة خل.
• ملح.
• فلفل أسود.
• كمون.
• زيت للقلي.
طريقة تحضير المسقعة:
1- رشي شوية ملح على شرائح الباذنجان وسيبيه شوية علشان يتصفي من الميه الزايدة.2- بعد ما يتصفى، اقليه في زيت سخن مع البطاطس والفلفل لغاية ما ياخدوا لون دهبي فاتح.
3- في مقلاة تانية، شوّحي البصل في شوية زيت لغاية ما يطرى، وبعدين ضيفي الثوم.
4- لما الثوم يصفر، ضيفي الخل وقلبّي الخليط كويس.
5- اسكبي عصير الطماطم وضيفي التوابل (ملح، فلفل، كمون)، واسيبيه على نار هادية لغاية ما يتسبك ويكثف.
6- في صينية فرن، حطي طبقة من الصلصة في القاع.
7- رصي طبقات من البطاطس، بعدين الباذنجان، وبعده الفلفل، ثم شرائح الطماطم.
8- اسكبي باقي الصلصة فوق الخضار ووزعيها كويس.
9- خلي الصينية على النار لمدة دقيقتين علشان تغلي غلوة سريعة، وبعدين حطيها في الفرن على درجة حرارة متوسطة لمدة 15 دقيقة لغاية ما النكهات تتجانس.
10- قدمي المسقعة دافية أو باردة مع العيش البلدي أو الأرز الأبيض. ولو حطيتي شوية طحينة جنبها، هتبقى وجبة مصرية أصيلة بامتياز.
