المكرونة من الأكلات اللي كلنا بنحبها، وسهل تتعمل بأكتر من طريقة، زي مكرونة بالبشاميل أو بالصوص الأحمر أو حتى المكرونة المحمرة، بس النهارده هنعمل مكرونة بطريقة مختلفة ومليانة طعم حلو، ودي وصفة الشيف عمرو إسماعيل اللي قدمها في برنامجه، وسهلة وسريعة وبتشبع جدًا.

المقادير:

مكرونة قلم مسلوقة (سلقناها قبل كده عشان نوفر وقت)
شرائح لحمة (يفضل تكون لحمة بقر مقطعة رفيع)
مشروم متقطع شرايح (الطازة هيبقى أحسن في الطعم)
بصل مفروم
ثوم مفروم
ملح وفلفل أسود حسب الذوق
كريمة طبخ
شوية مرقة (لحمة أو فراخ)
معلقة مستردة
شوية زبدة
بقدونس مفروم للزينة
معلقة كبيرة دقيق

طريقة التحضير:

1-في طاسة كبيرة على نار متوسطة، نحط الزبدة ولما تسيح، ننزل بالبصل والثوم ونقلبهم لحد ما يدبلوا وياخدوا لون دهبي.
2-بعد كده نحط شرائح اللحمة والمشروم، ونقلب كويس لحد ما اللحمة يتغير لونها وتبدأ تستوي.
3-نضيف الملح، الفلفل، والمستردة، ونقلبهم عشان كل حاجة تاخد من الطعم.
4-نرش الدقيق ونقلب بسرعة عشان ما يكلكعش.
5-نبدأ نضيف المرقة شوية بشوية ونقلب لحد ما الصوص يتقل ويبقى ناعم وكريمي.
6-دلوقتي نضيف المكرونة المسلوقة، ونصب الكريمة، ونقلب كله مع بعض كويس لحد ما المكرونة تشرب من الصوص والطعم.
7-نسيبها على نار هادية كام دقيقة، ومع تقليبة بسيطة كل شوية، تبقى المكرونة جاهزة.

التقديم:

نقدمها سخنة في طبق حلو، ونرش عليها شوية بقدونس مفروم، وهتبقى وجبة لذيذة وغنية تنفع للغدا أو العشا.