الفاهيتا من الأكلات المكسيكية اللي غزت العالم، وبقت من الأطباق المحبوبة عند ناس كتير، والسبب إنها سهلة، سريعة، وطعمها يجنن.
النهارده الشيف علاء الشربيني هيقولنا شوية أسرار تخلي الفاهيتا اللي بتعملها في البيت تنافس بتاعت المطاعم.

1- تختار إيه: فراخ ولا لحمة؟

• لو هتعملها فراخ: اختار صدور فراخ، وقطّعها شرايح رفيعة بالطول، علشان تستوي بسرعة وتبقى طرية.
• لو لحمة: يبقى الأحسن تستخدم نوع زي الريباي أو الفيليه، وتقطّعه شرايح عكس اتجاه العروق، علشان تبقى سهلة المضغ وطريّة.

2- التتبيلة.. هي السر

التتبيلة هي اللي بتفرق الطعم وتخليه أصل الفاهيتا. ولازم تبقى متوازنة بين الحامض والبهارات.

مكونات التتبيلة:
• عصير ليمونة كبيرة أو 2 معلقة خل.

• 2 معلقة كبيرة زيت زيتون.
• فص توم مهروس.
• معلقة صغيرة بابريكا.
• معلقة صغيرة كمون.
• نص معلقة كزبرة ناشفة.
• رشة فلفل أسود.
• معلقة صغيرة سكر بني (عشان تعدّل الطعم).
• رشة شطة (لو بتحب الحِرِق).

طريقة التتبيل:

حط الفراخ أو اللحمة في التتبيلة وسيبها ساعة على الأقل. ولو عايز الطعم يبقى أقوى، سيبها في التلاجة طول الليل.

3- الخضار ليه دور مهم:

الفاهيتا مش فاهيتا من غير الفلفل الملون (أحمر، أصفر، أخضر) والبصل.
قطّعهم شرايح شبه بعض عشان يستووا مع بعض.
وخلي بالك، ما تسوّيش الخضار زيادة، المفروض تفضل مقرمشة شوية، علشان تحس بطعمها.

4- لتسوية الصح:
لو عايز تاكل فاهيتا مظبوطة، اعمل كده:

• سخّن طاسة تكون تقيلة (حديد زهر أو تيفال سميكة) كويس أوي قبل ما تحط فيها حاجة.
• متزحمش الطاسة، اشتغل بكميات قليلة علشان الحاجة تتحمّر مش تتسلق.
• اطبخ الفراخ أو اللحمة الأول، ولما تستوي وتشيلها، استخدم نفس الطاسة علشان تشوّح فيها الخضار. كده هتاخد نكهة اللحمة أو الفراخ وتبقى أحلى بكتير.