وصفة النهارده مميزة جداً وتعتبر من الأطباق اللي تنفع في العزومات وتقف على السفرة بشكل فاخر وطعمها يجنن هنعمل عرق اللحمة الباردة المحشي بالجبنة الشيدر والبسطرمة، ومعاه صوص غني بطعم الزبدة والعسل والصويا، بيتقدم على فراش من البطاطس الكريمي المتبّلة.

المكونات:

لتحضير اللحمة والحشوة:

عرق لحمة باردة (مستوي وجاهز للتقطيع)

جبنة شيدر مقطعة شرائح

بسطرمة نظيفة ومقطعة شرائح

للتتبيل والصوص:

ملح (بكمية خفيفة)

فلفل أسود

بابريكا

أوريجانو

توم بودرة

بصل بودرة

جوزة الطيب

زعتر ناشف

2 مكعب زبدة

ملعقة صغيرة زيت

عسل نحل

صوص الصويا

كريمة طبخ

للتقديم:

بطاطس مسلوقة ومهروسة

كريمة

زبدة

ملح، فلفل، بابريكا، زعتر ناشف

طريقة التحضير:
 أولاً: تحضير الصوص

في طاسة على النار، ضيفي مكعبين زبدةمع شوية زيت.

نزلي بفص توم صحيح أو مفروم، ورشة زعتر ناشف.

ضيفي معلقة عسل، وبعدها صوص الصويا، وقلّبي كويس.

حطي البهارات (ملح خفيف، فلفل، بابريكا، توم بودرة، بصل بودرة، جوزة الطيب، أوريجانو).

قلّبي كل ده لحد ما الصوص يتجانس واتركيه على جنب.

 ثانياً: تحضير البطاطس الكريمي

في طاسة تانية، سيحي زبدة مع شوية زيت.

نزلّي بالبطاطس المسلوقة والمهروسة، وقلبيها.

ضيفي الكريمة، ملح، فلفل، بابريكا، وزعتر ناشف.

قلبي كويس لحد ما تبقى ناعمة وكريمي.

 ثالثاً: تجهيز العرق والحشو

قطّعي عرق اللحمة إلى شرائح بالطول من غير ما توصلي للآخر (زي الكتاب).

بين كل طبقة وطبقة، حطي شريحة جبنة وشريحة بسطرمة.

حطي البطاطس في بايركس وافرديها كويس.

فوقها ضيفي العرق المحشي بالجبنة والبسطرمة.

اسكبي الصوص اللي حضرناه فوق العرق بهدوء.