أ
أ
لو ما عندكش فرن أو كل مرة تطلع الكنافة ناشفة أو بتتحرق، فالوصفة دي هتغيّر رأيك تمامًا النهارده هنعمل كنافة الطاسة بالقشطة، من غير فرن، من غير ألوان، ولا تعقيد ,طرية من جوه، ومقرمشة من بره، وبتدوب في البُقّ.
بمكونات بسيطة وخطوات سهلة، هتطلع معاك أحلى كنافة ممكن تدوقها في حياتك.
المكونات:
نص كيلو كنافة (500 جم) – مجمدة أو فريشكوباية سمنة (أو حسب الحاجة)
كوباية سكر بودرة
2 ملعقة كبيرة عسل نحل أو شربات تقيل
مكونات القشطة:
2 كوباية لبن كامل الدسم4 ملاعق كبار نشا
علبة قشطة جاهزة (أو 3-4 ملاعق قشطة وش اللبن)
سكر حسب الرغبة
مكونات الشربات (القطر):
2 كوباية سكر2 كوباية ميّة
عصرة ليمونة
2 ملعقة كبار عسل نحل (اختياري)
طريقة التحضير:
تحضير الشربات:في حلة صغيرة، ضيفي السكر والمية وسخّنيهم على نار متوسطة.أول ما يبدأ يغلي، ضيفي عصرة ليمونة وملعقتين عسل نحل.
سيبيه يغلي حوالي 6 دقايق لحد ما يبقى سميك.
ارفعيه من على النار وسيبيه يبرد تمامًا.
تحضير القشطة:
قلبي اللبن مع النشا على البارد لحد ما يدوب كويس.حطيه على نار متوسطة وقلّبي باستمرار.
أول ما يبدأ يتقل، ضيفي القشطة وقلّبي كويس.
لما يبقى قوامه كريمي، شيليه من على النار وسيبيه يبرد.
تحضير الكنافة:
فتّتي الكنافة لو كانت مجمدة بعد ما تفك شوية (ممكن بالمقص).ضيفي عليها السمنة وافركيها كويس جدًا لحد ما تتغلف كلها.
بعد كده، ضيفي السكر البودرة وافركيها تاني.
التجميع في الطاسة:
اختاري طاسة مقاس 24 وادهنيها بسمنة.افردي نص كمية الكنافة في الطاسة واضغطيها كويس، وخصوصًا الأطراف.
حطي طبقة القشطة بالتساوي، من غير ما توصل للأطراف.
افردي باقي الكنافة على الوش واضغطيها برفق.
التسوية:
حطي الطاسة على نار هادية جدًا.اقعدي 40 ثانية على كل طرف من الطاسة، ولفيها كل شوية عشان تاخد لون موحد.
أول ما الأطراف تاخد لون، قلّبيها على طبق فيه دهنة زيت، وارجعيها للطاسة الجهة التانية.
سيبيها 2-3 دقايق على نار أعلى شوية لحد ما تتحمر.
الخطوة الأخيرة:
أول ما تستوي، صبي عليها الشربات البارد وهي سخنة.غطيها بفويل 5 دقايق علشان تبقى طرية من جوه.
قطّعيها وقدّميها وهي لسه دافية… هتاكلوا أحلى كنافة في حياتكم!
